काठमाडौं। सरकारी स्वामित्वको खाद्य व्यवस्था तथा व्यापार कम्पनीले यस वर्षको दसैं, तिहार र छठ लक्षित सुपथ मूल्य पसल भदौ अन्तिम साताबाट खुल्ने तयारी अन्तिम चरणमा पुर्याएको छ।
सहुलियत पसल सञ्चालन अनुमतिको प्रस्तावससहित सरोकारवाला उद्योग, वाणिज्य तथा आपूर्ति मन्त्रालयमा पत्राचार गरिसकेको व्यापार कम्पनी खरिद विभाग प्रमुख अनन्तराज पौडेलले बताए। उनका अनुसार गत वर्ष ६० स्थानमा सहुलियत पसल खोलिए पनि यो वर्ष संख्याबारे अहिलेसम्म निर्णय भइसकेको छैन।
मन्त्रालय पठाइएको प्रस्ताव स्वीकृत हुनासाथ सकेसम्म भदौ ३० देखि यो वर्षको चाडपर्व लक्षित सहुलियत पसल उद्घाटन गर्ने गरी आन्तरिक छलफल भइरहेको उनको भनाइ छ।मन्त्रालयबाट निर्णय भएर आउनासथा सहुलियत पसल सञ्चालन गरिने उनले बताए।
‘भदौ अन्तिम साता चाडपर्व लक्षित सहुलियत पसल खोल्ने प्रस्ताव उद्योग, वाणिज्य तथा आपूर्ति मन्त्रालयमा पठाएका छौं। मन्त्रालयले उक्त प्रस्ताव स्वीकृत भएको जानकारी दिनासाथ सञ्चालनमा ल्याउँछौं’, उनले भने।
यस वर्ष खाद्यका सबै आउटलेटबाट सहुलियत पसल सञ्चालन गर्ने तयारी अगाडि बढाइएको उनले जानकारी दिए।खाद्यले गत वर्ष दसैं–तिहारका लागि ६० वटा सहुलियत पसल सञ्चालन गरेको थियो। यो वर्षका लागि कति संख्यामा खुलाउने भन्ने निर्णय मन्त्रालय पठाइएको प्रस्ताव स्वीकृत भएपछि हुने खाद्यले जनाएको छ।
देशभरका विभिन्न स्थानमा खुलाइने सहुलियत पसलमा बजार मूल्यभन्दा केही सस्तोमा दाल, चामल, गेडागुडी, चिनी तथा मसला खरिद गर्न सकिनेछ।
सहुलियत पसल सञ्चालनमा ल्याएपछि बजार मूल्य नियन्त्रणमा सघाउ पुग्ने अपेक्षा सरकारको छ। सहुलियत पसलमा ५ देखि १० प्रतिशतसम्म सस्तोमा खाद्यान्न, तेल, चिनी, दाललगायत वस्तु बिक्री गरिँदै आएको छ।
सहुलियत पसल सञ्चालनका लागि खाद्य कम्पनी र साल्ट ट्रेडिङलगायतका सरकारी संस्थालाई सरकारले जिम्मा दिँदै आएको छ।
