काठमाडौं। सर नमस्कार, जेनजी आन्दोलनका क्रममा घाइते भएका एक जनालाई समस्या आइपर्यो, सहजीकरण गरिदिनुपर्यो”, गृह मन्त्रालयमा स्थापना भएको जेनजी हेल्पडेस्कमा गुनासो सुनिसकेपछि दोलखाका साम्राज्य खड्काले गुनासोलाई सम्बन्धित ठाउँमा ‘रेफर’ गरिदिए।
असोज ७ गते स्थापना भएको जेनजी हेल्पडेस्कमा खड्कासँगै दैलेखका राजेन्द्र अधिकारी र मोरङका जुनाल गदाल हरेक दिन यसैगरी गुनासा सुन्छन् र सम्बन्धित ठाउँमा पुर्याउँछन्। “बिहान १० बजेदेखि काम सुरु हुन्छ, तर घर फर्कने टुङ्गो हुँदैन, कहिलेकाँही रात पनि यहीँ बित्छ”, खड्काले कामको व्यस्तता सुनाए। फोन गर्नेहरु अधिकांशले आफ्ना गुनासा, सुनाउँछन् भने कतिपयले सहयोगको अपेक्षा पनि राख्छन्।
खड्काका अनुसार यो कुनै सरकारी नियुक्ति होइन। जेनजी समूहले स्वयम सेवकका रुपमा उनीहरुलाई हेल्पडेस्कमा खटाएको हो। दैलेखका राजेन्द्र अधिकारीको अनुभवमा सिंहदरबारभित्र बसेर सहयोगी भूमिका निभाउन सजिलो नहुने रहेछ।
अधिकारीका अनुसार फोन गर्नेहरुले सिंहदरबारमा पस्ने गेट पासदेखि अस्पतालमा उपचाररत घाइतेका समस्या सुनाइरहँछन्। “प्रक्रियागत काम गर्दा कहिलेकाँही केही ढिला पनि हुन्छ, अलिकति ढिला हुँदा केही जेनजी साथीहरु रिसाउँछन्, हामीलाई कतिपय अवस्थामा सम्झाउन पनि गाह्रो हुन्छ।”
जेनजी हेल्पडेस्कमा हालसम्म १२४ वटा गुनासा रेकर्ड भएका छन्। जसमध्ये ८३ वटा गुनासा जेनजीले गरेका छन्। जेनजी आन्दोलनका पीडित र पीडितका परिवारमा देखिएको समस्या सुल्झाउनतर्फ आफूहरु बढी केन्द्रित भएको अधिकारीको भनाइ छ।
मोरङका जुनाल गदालका अनुसार जेनजीका समस्यासँगै सिमान्तकृत समुदायले भोग्नु परेका समस्या, सहकारी पीडितले पनि हेल्पडेस्क गुहार्छन्। “कतिपयले त हामीले उहाँका दुःखेसो सुनिदिँदा मात्रै पनि राहत महसुस गर्नुहुन्छ”, गदालले भने, “यद्यपि अहिले हामी जेनजीलाई नै केन्द्रित गरेर सहयोग गर्दै आएका छौँ।”
उनका अनुसार कतिपय घाइते अस्पतालबाट डिस्चार्ज भएपछि दुःख पाएको अवस्था छ। यस्ता गुनासालाई हामीले उपलब्ध स्रोत र साधनबाट जतिसक्दो चाँडो सम्बोधन गर्ने प्रयास गरिन्छ। “हामीले यहाँ बसेर काम गर्दा सिहंदरबार र नागरिकबीच ठूलो खाडल रहेको पायौँ, यहाँ आएपछि नागरिकका पीडाबारे बोध भएको छ, उहाँको पीडामा मलहम लगाउने हाम्रो प्रयास हो ।”
हेल्पडेस्कमार्फत गुनासो गर्दा जेनजीले सहयोग गर्छन् भन्ने धेरैलाई विश्वास लागेको उनको बुझाइ छ। यसले आफूहरुलाई थप जिम्मेवार बनाएको उहाँहरुको भनाइ छ।
गृह मन्त्रालयका सहसचिव एवं प्रवक्ता आनन्द काफ्लेले गत भदौ २३ र २४ गते भएको जेनजी आन्दोलनपछि कतिपयले असुरक्षित महसुस गरेको, शान्ति सुरक्षामा चुनौती देखिएको र जेनजी पुस्ताका थुप्रै गुनासो आउने हुँदा समाधानका लागि हेल्पडेस्क राखेको बताए।
जसमा जेनजी पुस्ताका युवाहरुले नै गुनासो सुन्छन् र समाधानमा सहजीकरण गर्दै आएका छन्।
