वीरगञ्ज नाका हुँदै २ खर्ब १८ अर्बको सामान आयात

अर्थतन्त्र

गृहपृष्ठ
अर्थतन्त्र

वीरगञ्ज नाका हुँदै २ खर्ब १८ अर्बको सामान आयात

क्यापिटल नेपाल शनिबार, कात्तिक २२, २०८२

पर्सा। वीरगञ्ज नाका हुँदै चालू आर्थिक वर्षको तीन महिनामा २ खर्ब १८ अर्ब १० करोड मूल्य बराबरको सामान आयात भएका छन्। गत आवको तीन महिनाको तुलनामा चालू आवको सोही अवधिमा आयात १९ प्रतिशत वृद्धि अर्थात् ३४ अर्ब २३ करोड बढीका सामान आयात भएका हुन्।

वीरगञ्ज भन्सार कार्यालयका अनुसार गत आवको तीन महिने अवधिमा १ खर्ब ८३ अर्ब ८७ करोड मूल्य पर्ने वस्तु तथा सामान भित्रिएको थियो। वीरगञ्ज भन्सार कार्यालयका प्रमुख भन्सार प्रशासक विष्णुप्रसाद ज्ञवालीले वीरगञ्ज नाका हुँदै चालू आवको तीन महिनामा आयात ह्वात्तै बढेको जानकारी दिए।

वीरगञ्ज नाका हुँदै तीन महिनामा ३८ अर्ब ९ करोड मूल्य पर्ने पेट्रोलियम पदार्थ आयात भएको छ। १९ अर्ब ८४ करोड मूल्य पर्ने फलाम तथा फलामबाट बनेका सामान आयात भएका छन्। सोही अवधिमा १५ अर्ब ५७ करोड मूल्य पर्ने मेसिनरी तथा पार्टपुर्जा आयात भएको छ। १४ अर्ब ८० करोड मूल्य पर्ने भटमासको कच्चा तेल आयात भएको छ।

त्यस्तै, १२ अर्ब ८१ करोड मूल्य पर्ने मलखाद आयात भएको छ। १२ अर्ब १६ करोड मूल्य पर्ने सबै प्रकारका कपडा आयात भएको छ। १२ अर्ब छ करोड मूल्य पर्ने इलेक्ट्रिक मेसिनरी, उपकरण र तीनका पार्टपुजा आयात भएका छन्।

सोही अवधिमा १० अर्ब १२ करोड मूल्य पर्ने यातायातका साधन र तिनका पार्टपुर्जा आयात भएको वीरगञ्ज भन्सार कार्यालयले जनाएको छ।–रासस

प्रकाशित मिति: शनिबार, कात्तिक २२, २०८२ १२:१७

प्रतिक्रिया दिनुहोस्