काठमाडौं। गत भदौ २३ र २४ गते नेपालमा भएको जेन-जी आन्दोलनको असर अझै यूएई जाने नेपाली नागरिकमाथि परेको छ । संयुक्त अरब इमिरेट्स (यूएई)ले भिजिट र श्रम भिसा पुनः खुल्ला गरे पनि अब नेपाली नागरिकले नेपाल प्रहरीबाट जारी प्रहरी रिपोर्ट अनिवार्य रूपमा पेस गर्नुपर्ने भएको छ।
काठमाडौंस्थित यूएई दूतावासले भिसा आवेदनका लागि नेपाल प्रहरीले जारी गरेको प्रहरी रिपोर्ट अनिवार्य गर्ने नयाँ नियम लागू गरेको जानकारी दिएको छ। यो नियम श्रम भिसामा लागू हुनेछ। यूएईले भदौ २३ र २४ गते नेपालमा भएको जेन-जी आन्दोलनपछि सुरक्षा कारण देखाउँदै नेपालीका लागि भिजिट र श्रम भिसा जारी गर्न बन्द गरेको थियो। तर, भिसा रोक्ने निर्णयको औपचारिक जानकारी नेपाल सरकारलाई दिइएको थिएन। यूएई दूतावासले अहिले सबै प्रकारका भिसा खुल्ला गरिएको जानकारी दिएको छ। तर, भिसा प्रक्रियामा थप कडाइ गर्दै प्रहरी रिपोर्ट अनिवार्य गरिएको हो ।
५ हजार श्रमिक अलपत्र, वर्क परमिटको म्याद सकिँदै
भिसा बन्द भएपछि यूएई सरकारबाटै वर्क परमिट (श्रम अनुमति) जारी गरिसकेका झन्डै ५ हजार नेपाली श्रमिक रोकिएका छन् । उनीहरूको वर्क परमिटको अवधि सकिने क्रममा छ, जसले गर्दा श्रमिकहरू समस्यामा परेका छन् । नेपाल वैदेशिक रोजगार व्यवसायी संघले प्रहरी रिपोर्ट लिई नेपालीका लागि भिसा खुल्ला गर्न नेपाल सरकारलाई अनुरोध गर्दै आएको थियो। अब भिसा खुलेसँगै अलपत्र परेका श्रमिकहरू यूएई जान सक्ने अपेक्षा गरिएको छ ।
यूएई नेपाली श्रमिकका लागि प्रमुख गन्तव्य भएको छ। वैदेशिक रोजगार विभागबाट श्रम स्वीकृति लिनेमध्ये झन्डै ४० प्रतिशत श्रमिक यूएई जाने गर्छन्। यो नेपालबाट वैदेशिक रोजगारीमा जाने कुल जनसंख्याको सबैभन्दा ठूलो हिस्सा हो। आर्थिक वर्ष २०८१/०८२ को तथ्यांकअनुसार यूएई जानका लागि २ लाख १ हजार १४८ जनाले श्रम स्वीकृति लिएका छन्। यो तथ्यांक पहिलो पटक स्वीकृति लिने अर्थात् पुनः श्रमस्वीकृतिबाहेकको हो ।
पुनः श्रमस्वीकृति लिने श्रमिकसमेत गणना गर्दा यो संख्या २ लाख ७४ हजार ५९० जना हुने वैदेशिक रोजगार विभागले सार्वजनिक गरेको तथ्यांकले देखाउँछ । यसले यूएई नेपाली श्रमिकका लागि कत्तिको महत्त्वपूर्ण गन्तव्य हो भन्ने कुरा स्पष्ट पार्छ ।
के हुनेछ अब ?
प्रहरी रिपोर्ट अनिवार्य भएसँगै अब यूएई जान चाहने नेपाली नागरिकले भिसा आवेदनसँगै नेपाल प्रहरीबाट जारी प्रहरी रिपोर्ट पनि पेस गर्नुपर्नेछ। यसले भिसा प्रक्रियामा केही हदसम्म ढिलाइ हुन सक्ने अनुमान गरिएको छ। तर, भिसा खुलेसँगै अलपत्र परेका हजारौं श्रमिकले राहत पाउने र यूएईमा रोजगारीको अवसर पुनः सुचारु हुने विज्ञहरूले बताएका छन् ।
