मनमोहक हिमशृंखला अवलोकन गर्दै गर्न सकिने लाङटाङ पदमार्ग काठमाडौंबाट नजिकको पदमार्ग हो। असोज र कात्तिक पदयात्राका लागि राम्रो सिजन मानिन्छ। यही सिजनमा यो पदमार्गमा विदेशीभन्दा बढी नेपाली भेटिन्छन्। लाङटाङ खोला सँगसँगै अघि बढ्छ लाङटाङ पदमार्ग। बीचबीचमा भेटिने अनुपम झरना, हिमशृंखलाले पदयात्रीलाई आकर्षित गरिरहेको हुन्छ।
काठमाडौंबाट नजिक पर्ने पदमार्ग भएकाले पनि आन्तरिक पर्यटकको भीड लाग्ने गरेको छ। नजिकैबाट प्राकृतिक सौन्दर्य अवलोकन र अनुभूत गर्न लाङटाङ पदमार्ग प्रसिद्ध छ।
क्यामेराका लेन्सले सुन्दर हिमाल, झरना, नदीनाला र प्राकृतिक सौन्दर्य कैद गर्दै यात्रा गर्नु यस पदमार्गको अर्का पक्ष रहेको छ । एकैपटक आधा दर्जन हिमशृंखला अवलोकन गर्न पाइने, क्यान्जी गुम्बाबाट वरिपरि हिउँले ढाकेका हिमाल हेर्न पाइने र पदमार्गमा बसोबासका लागि पर्याप्त होटल भएकाले पनि यहाँ आन्तरिक र बाह्य पर्यटक भरिभराउ हुन्छन्।
बालाजु, कलंकी, थानकोट, गल्छी, नुवाकोट धुन्चे हुँदै ६–७ घन्टामा स्याफ्रुबेँसी पुगिन्छ। त्यसपछि सुरु हुन्छ, पैदल यात्रा। स्याफ्रुबेँसीबाट ३ घन्टाको पैदल यात्रापछि ब्याम्बोमा बास बस्न सकिन्छ। तर, समय रहेमा लामा होटल वा रिइभरसाइडमा गएर बास बस्दा उपयुक्त हुन्छ ।
भोलिपल्ट उकाली ओराली गर्दै लाङटाङ वा क्यान्जिङ गुम्बा पुगिन्छ। यात्रामा लाङटाङ खोलाले साथ छोड्दैन। पहाडको चेपबाट झरिरहेका झरना, चरा चुरुंगीको चिरबिरचिरबिर आवाजले मन शान्त बनाउँछ। अर्को दिन बिहानै क्यान्जिङ उपत्यकाबाट क्याजिङ री जान सहज हुन्छ। कतिपय भने क्यान्जिङ पुगेपछि यलापिक अथवा सेर्गोरीतर्फ जाने गर्दछन्।
तस्बिरः क्षितिज तामाङ
