काठमाडौं।नेपाल विद्युत् प्राधिकरणको सहायक ‘नेपाल डिजिटल पूर्वाधार कम्पनी’ पूर्ण रूपमा सञ्चालनमा आएको छ। मुलुकको सूचना प्रविधि र दूरसञ्चार क्षेत्रमा आमूल परिवर्तन ल्याउने उद्देश्यका साथ प्राधिकरणले यसलाई सञ्चालनमा ल्याएको जानकारी दिएको हो।
गुणस्तरीय र भरपर्दो इन्टरनेट सेवा, दूरसञ्चार तथा सूचना प्रविधि क्षेत्रको मेरुदण्ड बन्ने लक्ष्यका साथ यो कम्पनीले आफ्नो कार्यारम्भ गरेको पनि प्राधिकरणले जानकारी दिएको छ।
‘पूर्वाधार साझा गर्ने अवधारणामा आधारित यो कम्पनीले सहरी सुन्दरता बढाउन, दुर्गम क्षेत्रमा इन्टरनेटको पहुँच विस्तार गर्न र सूचना प्रविधि प्रणालीको एकीकृत विकासमा महत्त्वपूर्ण भूमिका खेल्ने अपेक्षा प्राधिकरणले गरेको छ,’ प्राधिकरणका कार्यकारी निर्देशक हितेन्द्रदेव शाक्यले भने, ‘प्राधिकरणका अनुसार कम्पनीले इन्टरनेट सेवाप्रदायकलाई प्लग–एन्ड–प्ले’ मोडलमा पूर्वाधार उपलब्ध गराउनेछ। यसो हुँदा सेवाप्रदायकले आफ्नै पोल गाड्ने वा तार टाँग्ने झन्झट गर्नुपर्दैन।’
प्राधिकरणको पूर्वाधार प्रयोग गर्दा सेवाप्रदायकको पुँजीगत खर्च उल्लेख्य रूपमा घट्ने र त्यसको प्रत्यक्ष लाभ उपभोक्ताले सस्तो इन्टरनेटको रूपमा पाउने अपेक्षा गरिएको पनि प्राधिकरणको भनाइ छ।
त्यसैगरी कम्पनीले प्राधिकरणसँग रहेका अप्टिकल फाइबर,भूमिगत डक्ट, पोललाई ‘प्यासिभ एसेट्स’ का रूपमा भाडामा उपलब्ध गराउने पनि जानकारी दिएको छ। काठमाडौँ उपत्यकाको मुख्य समस्याका रूपमा रहेको ‘तारको गुजुल्टो’ हटाउन यस कम्पनीले प्राथमिकताका साथ काम गर्ने पनि प्राधिकरणले बताएको छ।
‘भूमिगत पाइपको साझा प्रयोगले सहरी सौन्दर्य फर्काउनुका साथै विद्युत् र टेलिफोनका तार आपसमा अल्झिँदा हुने आगलागी र दुर्घटनाको जोखिमलाई समेत न्यून गर्ने अपेक्षा हामीले गरेका छौँ,’ शाक्यले भने, ‘हरेक कम्पनीले छुट्टाछुट्टै सडक खन्ने झन्झट पनि योसँगै अन्त्य हुनेछ।’
शाक्यले अब प्रतिस्पर्धा पूर्वाधारमा होइन, सेवाको गुणस्तरमा हुनुपर्नेमा जोड दिदैँ भने, ‘जब सबैले एउटै ‘डिजिटल सडक’ प्रयोग गर्छन्, तब कम्पनीहरूबीच गुणस्तरीय सेवा र सुलभ दरका लागि प्रतिस्पर्धा हुनेछ, जसको प्रत्यक्ष लाभ उपभोक्तालाई पुग्ने निश्चित छ। कम्पनीले डाटा सेन्टरसम्बन्धी विभिन्न सेवासमेत प्रदान गर्ने योजना बनाएको छ।’
उनले सरकारले नेपालका प्रत्येक घरधुरीमा डिजिटल कनेक्टिभिटी पुर्याउने लक्ष्य राखेको स्मरण पनि गराए।
‘त्यसलाई यो कम्पनीले नयाँ गति दिने अपेक्षा गरेका छौँ,’ उनले भने, ‘ग्रामीण क्षेत्रमा आफ्नै पूर्वाधार निर्माण गर्न निजी कम्पनीलाई अत्यन्तै महँगो पर्ने हुनाले प्राधिकरणको विद्यमान प्रसारण लाइन प्रयोग गर्दा सेवा लागत घट्ने र सर्वसाधारणले सस्तोमा इन्टरनेट पाउने वातावरण बन्नेछ। नेपाल डिजिटल पूर्वाधार कम्पनीको स्थापनासँगै नेपालको डिजिटल रूपान्तरणको यात्रामा नयाँ अध्याय थपिएको छ। यसले सरकारको ‘डिजिटल नेपाल फ्रेमवर्क’ लाई मूर्तरुप दिन कोसेढुंगा सावित हुने विश्वास प्राधिकरणले लिएको छ।’
