पर्यटकीय भिसामा कम्बोडिया नजान दूतावासको अनुरोध

अर्थतन्त्र

गृहपृष्ठ
अर्थतन्त्र

पर्यटकीय भिसामा कम्बोडिया नजान दूतावासको अनुरोध

क्यापिटल नेपाल सोमबार, वैशाख २१, २०८३

काठमाडौं। थाइल्याण्डस्थित नेपाली दूतावासले नेपालीलाई प्रलोभनमा परी पर्यटकीय भिसामा कम्बोडिया नजान अनुरोध गरेको छ। दूतावासले सोमबार सूचना जारी गर्दै उच्च तलब तथा आकर्षक सुविधाको प्रलोभनमा परी पर्यटकीय भिसामा कम्बोडिया लगायत अन्य मुलुकहरूमा रोजगारीका लागि नजान अनुरोध गरेको हो ।

दूतावासले भनेको छ, वैदेशिक रोजगारीका लागि विदेश जानु अघि नेपालस्थित वैदेशिक रोजगार विभाग तथा सम्बन्धित मुलुकमा रहेका नेपाली राजदूतावास वा नेपाली वाणिज्य दूतावाससँग सम्पर्क गरी रोजगारदाता संस्था तथा रोजगारीको आधिकारिकता यकिन गरी वैदेशिक रोजगार विभागबाट श्रम स्वीकृति लिएर मात्र वैदेशिक रोजगारीमा जान समेत अनुरोध गरिन्छ।

यस्तै दूतावासले भिसा अवधिभन्दा बढी समय कम्बोडियामा नबस्न र कुनै पनि गैरकानूनी गतिविधिमा संलग्न नहुन उल्लेख गरेको छ। गैरकानूनी गतिविधिमा संलग्न रहेको भए त्यस्तो कार्य बन्द गरी नेपाल फर्कन दूतावासले अनुरोध गरेको छ।