काठमाडाैं। औद्योगिक तथा व्यावसायिक घराना चौधरी ग्रुपले आफ्ना कर्मचारीको दीर्घ सेवा, समर्पण र योगदानको कदर गर्दै ‘एम्प्लोयी सर्भिस माइलस्टोन रिकग्निसन प्रोग्राम’मार्फत सम्मान गरेको छ। ललितपुरको द प्लाजामा आइतबार आयोजित कार्यक्रममा ग्रुपअन्तर्गतका विभिन्न कम्पनी तथा व्यवसायिक इकाइमा लामो समयदेखि कार्यरत २६३ कर्मचारीलाई विशेष सम्मान गरिएको हो।
‘अनरिङ माइलस्टोन्स, सेलिब्रेटिङ यू’ नारासहित आयोजित कार्यक्रममा १० वर्षभन्दा बढी तथा २० वर्षभन्दा बढी सेवा अवधि पूरा गरेका कर्मचारीलाई सम्मान गरिएको थियो। त्यस्तै तीन वर्ष सेवा अवधि पूरा गरेका कर्मचारीलाई समेत कदरपत्र प्रदान गर्दै उनीहरूको योगदानको उच्च सम्मान गरेको थियो । चौधरी ग्रुपले कार्यक्रममार्फत कर्मचारीको संस्थाप्रतिको निष्ठा, मेहनत र निरन्तर योगदानको उच्च मूल्यांकन गरेको हो।
चौधरी ग्रुपका प्रबन्ध निर्देशक निर्वाण चौधरी, निर्देशक सारिका चौधरी तथा संस्थाका शीर्ष नेतृत्वले दीर्घ सेवा गर्ने कर्मचारीलाई कदरपत्रसहित सम्मान वितरण गरेका थिए।
कम्पनीका प्रबन्ध निर्देशक निर्वाण चौधरीले कर्मचारी नै संस्थाको सबैभन्दा ठूलो शक्ति भएको उल्लेख गर्दै दीर्घकालीन समर्पण र विश्वासकै कारण चौधरी ग्रुपले राष्ट्रिय तथा अन्तर्राष्ट्रिय स्तरमा सफलता हासिल गर्न सकेको बताए ।
‘हाम्रो सफलताको आधार नै हाम्रो टिम हो। कर्मचारीको निरन्तर मेहनत, निष्ठा र प्रतिबद्धताले नै चौधरी ग्रुपलाई आजको स्थानमा पुर्याएके हो। हामी केवल व्यवसाय निर्माण गरिरहेका छैनौं, विश्वास, सम्बन्ध र भविष्य निर्माण गरिरहेका छौं,’ उनले भने।
चौधरी ग्रुपले कर्मचारीमैत्री कार्यसंस्कृति, दीर्घकालीन करिअर विकास तथा संस्थाप्रतिको अपनत्वलाई सुदृढ बनाउने उद्देश्यले यस्ता कार्यक्रमलाई निरन्तरता दिँदै आएको जनाएको छ।
