काठमाडौं। मोरिस ग्यारेज (एमजी) मोटर्सको नेपालस्थित आधिकारिक वितरक प्यारामाउन्ट मोटर्स प्रालिले 'एमजीएस ६ इभी ट्रफी लङ रेञ्ज' नेपाली बजारमा औपचारिक रूपमा सार्वजनिक गरेको छ। यो सार्वजनिक कार्यक्रम एमजी एसएमआईएलका प्रतिनिधि मुहम्मद कासिम जहूरको विशेष उपस्थितिमा सम्पन्न भएको थियो।
एमजीएस६ इभी पाँच सिटे पारिवारिक एसयूभी हो, जो मध्यम आकारको सी र ठूलो डी वर्गको बीचमा अवस्थित छ। यो गाडी एमजीको प्रशिद्ध मड्युलर स्केलेबल प्लेटफर्म (एमएसपी)मा आधारित छ, जसमा हल्का चेसिस, अत्याधुनिक ११० मिलिमिटर पातलो ब्याट्री डिजाइन र अगाडि म्याकफर्सन स्ट्रट तथा पछाडि मल्टि-लिङ्क सस्पेन्सन प्रणाली प्रयोग गरिएको छ।
गाडीको वायु अवरोध गुणाङ्क मात्र ०.२७ छ (एरोडाइनामिक डिजाइनको उत्कृष्ट नमुना)। यसमा सक्रिय ग्रिल शटर, फ्रन्ट व्हील डिफ्लेक्टर र एरो-अप्टिमाइज्ड व्हील कभरले ७७ किलोवाट-आवर ब्याट्रीबाट थप करिब ४८ किलोमिटर रेञ्ज थप्न सहयोग पुर्याउँछन्।
रियर-व्हील ड्राइभ संस्करणले १८० किलोवाट र ०–१०० किलोमिटर प्रति घण्टाको गति ७.३ सेकेन्डमा हासिल गर्दछ। सबैभन्दा शक्तिशाली ट्रफी ड्युअल मोटर संस्करणमा भने संयुक्त २६६ किलोवाट र ५४० न्युटन मिटर टर्क उत्पन्न हुन्छ, जसले ०–१०० किलोमिटरको रफ्तार केवल ५.१ सेकेन्डमा पार गर्दछ।
नेपाली बजारमा आएको ट्रफी लङ रेञ्ज संस्करणमा १८० किलोवाटको एकल मोटर र ७७ केडब्लूएच ब्याट्री छ। डब्लूएलटीपी मापदण्डअनुसार यसले ५३० किलोमिटरसम्मको रेञ्ज प्रदान गर्दछ।
सबै संस्करण १४४ किलोवाटको डिसि फास्ट चार्जिङद्वारा मात्र ३८ मिनेटमा १० प्रतिशतबाट ८० प्रतिशत चार्ज हुन्छ। साथै घरायसी एसी चार्जरबाट ११ किलोवाटमा करिब ८ घण्टामा पूर्ण चार्ज हुन्छ।
भित्री भागमा १२.८ इन्चको एचडी इन्फोटेनमेन्ट स्क्रिन र अनुकूलन गर्न सकिने १०.२५ इन्चको ड्राइभर डिस्प्ले छ। ट्रफी मोडलमा युट्युब, टिकटक, स्पोटिफाइ र अमेजन म्युजिक जस्ता एकीकृत एपहरू पनि समावेश छन्।
यो गाडी एमजीको पहिलो मोडल हो, जसमा हेड-अप डिस्प्ले (एचयूडी) राखिएको छ। यसले गति, नेभिगेशन र बुद्धिमान ड्राइभिङ प्रणालीका सूचनाहरू सिधै सामुन्ने देखाउँछ।
ट्रफी मोडलमा तताउन र चिसो पार्न सकिने अगाडिका सिट, पानोरामिक छत (इलेक्ट्रिक ब्लाइन्डसहित) र ११ वटा साउन्ड सिष्टम छ। मालसामान राख्न पछाडि ६७४ लिटर र सिट फोल्ड गर्दा १९१० लिटरसम्मको ठाउँ उपलब्ध हुन्छ, जबकि अगाडिको 'फ्रङ्क'मा १२४ लिटरसम्म थप सामान राख्न सकिन्छ।
यूनाइटेड किङ्डम अहिले एमजीको विश्वको दोस्रो सबैभन्दा ठूलो बजार बनेको छ। पाँच वर्षमा ३ लाख २० हजार गाडी बिक्री भएका छन्, जसमध्ये १ लाख विद्युतीय थिए।
एमजीएस६ इभीले पाँच-तारा युरो एनक्याप सुरक्षा मूल्याङ्कन प्राप्त गरेको छ। यसमा वयस्क यात्रु सुरक्षामा ९२ प्रतिशत र कमजोर सडक प्रयोगकर्ता सुरक्षामा ८४ प्रतिशत अङ्क प्राप्त गरेको छ।
एमजीएस६ इभीलाई सन् २०२५ मा कम्पनीको सर्वोत्कृष्ट मोडलको रूपमा विश्लेषकहरूले मूल्याङ्कन गरेका छन्।
नेपाली बजारमा एमजीएस६ इभी ट्रफी लङ रेञ्ज रू. ६९ लाख ९९ हजारको विशेष प्रारम्भिक मूल्यमा उपलब्ध हुनेछ। कम्पनीले मोटरमा ५ वर्षको मानक वारेन्टी प्रदान गर्दछ भने हाल सञ्चालनमा रहेको विस्तारित वारेन्टी कार्यक्रमअन्तर्गत ११ देखि १५ वर्षसम्मको वारेन्टी सुविधा पनि उपलब्ध हुनेछ। ग्राहकहरू देशभरका एमजी शोरुमहरूमा गई यस प्रिमियम इलेक्ट्रिक एसयूभीको प्रत्यक्ष अनुभव लिन सक्नेछन्।
