काठमाडौँ। काठमाडौँ फिन्टेकको आयोजनामा आगामी २०२६ मे २७ (जेठ १३, २०८३) मा काठमाडौँमा एक विशेष मानव संशाधन (एचआर) सम्मेलन आयोजना हुन गइरहेको छ।
आर्टिफिसियल इन्टेलिजेन्स (एआई)को तीव्र विकास भइरहेको वर्तमान अवस्थामा नेतृत्वको भविष्य कस्तो हुन्छ र जनशक्तिलाई कसरी सही दिशा दिने भन्ने विषयमा केन्द्रित रहेर सम्मेलनमा बृहत् छलफल हुनेछ। यस कार्यक्रमले एचआर, बैंकिङ, एआई र डिजिटल रूपान्तरण क्षेत्रका प्रतिष्ठित व्यक्तित्वहरूलाई एउटै मञ्चमा जोड्ने जनाइएको छ।
आजको बदलिँदो परिवेशमा संस्थाहरूलाई प्रतिस्पर्धी, प्रविधिमैत्री र दूरदर्शी बनाउन एचआरका हरेक कार्यमा एआई, डाटा र डिजिटल प्रविधिलाई कसरी एकाकार गर्ने भन्ने कुरालाई सम्मेलनले मुख्य जोड दिएको छ। यसअन्तर्गत एचआरमा एआईको प्रयोग, डाटामा आधारित रणनीतिक निर्णय, डिजिटल कर्मचारी अनुभव, एआई युगमा नेतृत्व शैली र भविष्यको कार्यक्षेत्र एवं सीप विकास जस्ता समसामयिक विषयहरूमा गहन बहस हुने जनाइएको छ।
विज्ञ वक्ताहरू र उनीहरूको प्रस्तुति
सम्मेलनमा कर्पोरेट, प्रविधि र बैंकिङ क्षेत्रमा लामो अनुभव सँगालेका बुज्रुक विशेषज्ञहरूले आ-आफ्नो अनुभव र अन्तर्दृष्टि बाढ्नेछन्। हर्ष कुमारले भारतको बैंकिङ तथा वित्तीय क्षेत्रका स्थापित सीएचआरओ हुन्। उनले आफ्नै संस्थामा विभिन्न एआई परियोजनाहरूको सफल नेतृत्व गरिरहेका छन्। प्रविधि भित्र्याउँदै गर्दा संस्थाको कार्यसंस्कृति परिवर्तन गर्न एचआरले कसरी सारथिको भूमिका खेल्न सक्छ भन्नेबारे उनले प्रस्ट पार्नेछन्।
यस्तै शिल्पा कर्पोरेट तथा बैंकिङ क्षेत्रमा लामो समय नेतृत्व सम्हालेकी वरिष्ठ सीएचआरओ एवं प्रमाणित एआई व्यावसायिक हुन्। उनले व्यावसायिक नेतृत्वको आफ्नो अनुभवका आधारमा एआई र एचआरको संयोजन कसरी गर्ने भन्ने व्यावहारिक पाटोबारे चर्चा गर्नेछन्। आलोक नेपालको बैंकिङ क्षेत्रमा एआईको प्रयोग र यससम्बन्धी प्राविधिक कार्यहरूमा प्रत्यक्ष रूपमा जोडिएका विशेषज्ञ हुन्। उनले नेपाली बैंकिङ उद्योगमा एआई भित्र्याउँदाका वास्तविक अनुभव, मुख्य चुनौती र नयाँ अवसरहरूका बारेमा जानकारी गराउनेछन्।
युवा प्रतिभाको प्रवर्द्धन र आधुनिक एचआरको मार्गचित्र
काठमाडौँ फिन्टेकका अनुसार यस सम्मेलनको मुख्य ध्येय एचआर क्षेत्रका उदाउँदा युवा प्रतिभाहरूलाई प्रोत्साहन गर्नु र उनीहरूको क्षमतालाई उजागर गर्नु हो। एचआर पेसा अब परम्परागत कर्मचारी भर्ना, पेरोल वा प्रशासनिक कामकाजमा मात्र सीमित नरही डाटामा आधारित निर्णय प्रक्रिया र 'पिपल इन्टेलिजेन्स'तर्फ अगाडि बढाउनु पर्छ भन्ने बलियो सन्देश प्रवाह गर्नु नै सम्मेलनको मुख्य उद्देश्य रहेको जनाइएको छ।
को-को हुन् लक्षित सहभागी?
यो सम्मेलन विभिन्न उद्योग तथा व्यापारिक क्षेत्रका एचआर प्रबन्धकहरू, उच्च पदस्थ अधिकारीहरू, विभागीय प्रमुखहरू , लाइन म्यानेजरहरू, सुपरभाइजरहरू र नेतृत्वदायी भूमिकामा रहेका व्यक्तित्वहरूका लागि उपयोगी हुने बताइएको छ। यसले एआई र डिजिटल रूपान्तरणले कार्यश्रम र संगठनात्मक रणनीतिमा पार्ने दूरगामी प्रभावलाई बुझेर आफ्नो संस्थालाई अघि बढाउन सकिने उल्लेख गरिएको छ।
