५ वर्षको जग बसाउने बजेट ल्याएका छौं : अर्थमन्त्री वाग्ले

अर्थतन्त्र

गृहपृष्ठ
अर्थतन्त्र

५ वर्षको जग बसाउने बजेट ल्याएका छौं : अर्थमन्त्री वाग्ले

क्यापिटल नेपाल सोमबार, जेठ १८, २०८३

काठमाडौं। अर्थमन्त्री डा स्वर्णिम वाग्लेले आगामी ५ वर्षको जग बसाउने गरी यसपटक बजेट ल्याइएको बताएका छन्।

नेपाल आर्थिक पत्रकार संघ (नाफिज)ले राखेको ‘पोष्ट बजेट अन्तरक्रिया’मा अर्थमन्त्री डा वाग्लेले बजेट तयारीका लागि पर्याप्त समय थोरै हुँदा यसपटक समेट्न नसकिएका केही विषय अर्को वर्षको बजेटले सम्बोधन गर्ने बताए।

अहिलेको सरकार ५ वर्षका लागि भएकाले यसपटककै बजेटमा सबै विषय सम्बोधन गर्न सकिने अपेक्षा नगर्न पनि सबैसँग आग्रह गरे। उनले आगामी आर्थिक वर्षको बजेट कार्यान्वयन हुँदा कुल गार्हस्थ्य उत्पादन ७४ खर्ब ५८ अर्बको पुग्ने बताए।

भूकम्पपछि कुल गार्हस्थ्य उत्पादनको तुलनामा ३७ प्रतिशतसम्मको बजेट आएकोमा अहिले प्रक्षेपित जीडीपीको करीब २८ प्रतिशतको मात्रै रहेको उनकाे भनाइ छ। अर्थमन्त्री वाग्लेले १५ सय ८० अर्ब राजश्व संकलन गर्ने लक्ष्य राखेको बताउँदै ऋणमा धेरै भर नपरेको बताए।

उनले जीडीपीको तुलनामा ऋण ४३ प्रतिशतभन्दा बढी नहुने बताए। ७ प्रतिशतको आर्थिक वृद्धि २१ खर्ब २४ अर्बले मात्र नभई प्रक्षेपित ७४ खर्बको जीडीपीले गर्ने उनकाे दाबी छ।

बजार चलायमान बनाएर ७ प्रतिशत आर्थिक वृद्धि गर्न सकिने बताए। उनले बजेटमा नयाँ कार्यक्रम नभएको पुराना कार्यक्रमको दायित्व बढी हुँदा दबाबमा परेको बताए। सरकारले मुख्य राजमार्ग निर्माण सम्पन्न हुने भन्दै सिद्धार्थ राजमार्ग निर्माण अघि बढ्ने बताए।‘अहिले बुटवलबाट पोखरा जाने सडक विस्तार गर्दा ३५ अर्ब लाग्छ,’ उनले भने, ‘हामीले एक्सप्रेस–वे बनाउने कि भन्ने सोचेका छौं तर १ खर्ब लागत अनुमान छ।’

प्रकाशित मिति: सोमबार, जेठ १८, २०८३ १२:०७

प्रतिक्रिया दिनुहोस्