प्रतिनिधि सभाको बिहीबारको बैठकमा विनियोजन विधेयकमाथिको छलफलमा भाग लिँदै सांसद प्रकाश सिंह कार्कीले बजेट कार्यान्वयनमा पारदर्शिताको अभावले भ्रष्टाचारलाई प्रोत्साहन गर्ने चेतावनी दिए। बजेटमा हुने चुहावट रोक्न र ऋणमा निर्भर बजेट निर्माणको परम्परा तोड्नुपर्नेमा उनले जोड दिए।
कर नीतिका सन्दर्भमा सांसद कार्कीले राजस्व बढाउने नाममा थपिँदै जाने करको बोझप्रति असहमति जनाए। करको दायरा फराकिलो बनाउनुपर्ने, तर करदातामाथिको भार थप नगर्नुपर्ने उनको मत थियो। राजस्व विस्तारका लागि नयाँ कर थप्ने नीति दीर्घकालीन दृष्टिकोणबाट उपयुक्त नहुने उनले स्पष्ट पारे।
ऊर्जा क्षेत्रमा उनले उद्योगका लागि सस्तो बिजुली सुनिश्चित गर्न, किसानलाई सिंचाइका लागि निःशुल्क बिजुली दिन र उत्पादित विद्युत् जनताको घरघरमा पुर्याउन सरकारलाई आग्रह गरे। त्यस्तै, शिक्षामा लगाइएको कर देशको भविष्यमाथिकै कर भएको भन्दै बिजुली र शिक्षालाई करमुक्त गर्न उनले माग राखे।
कृषि अनुदान नीतिको समीक्षा गर्दै उनले दुई करोड रुपैयाँ लगानीमा मात्र ४० प्रतिशत अनुदान पाइने व्यवस्था सर्वसाधारण किसानको पहुँचभन्दा बाहिर रहेको बताउँदै नीति पुनरावलोकनको माग गरे। विदेशबाट फर्किएका युवालाई धितोविना कर्जा उपलब्ध गराउनुपर्ने सुझाव पनि उनले अगाडि सारे।
समग्रमा सांसद कार्कीले कर नीति सुधार, बजेट पारदर्शिता, ऊर्जा पहुँच विस्तार, शिक्षा करमुक्ति र युवा तथा कृषि क्षेत्रमा लक्षित सहुलियतयुक्त कर्जा कार्यक्रम प्रभावकारी बनाउन सरकारसँग माग गरे।
