परराष्ट्रमन्त्रीले भने– आर्थिक कूटनीति र सौम्य शक्ति प्रवर्द्धन सरकारको प्राथमिकतामा

राजनीति

गृहपृष्ठ
राजनीति

परराष्ट्रमन्त्रीले भने– आर्थिक कूटनीति र सौम्य शक्ति प्रवर्द्धन सरकारको प्राथमिकतामा

क्यापिटल नेपाल बिहीबार, असार ४, २०८३

काठमाडौं। परराष्ट्रमन्त्री शिशिर खनालले आगामी आर्थिक वर्ष २०८३/८४ मा आर्थिक कूटनीति, सौम्य शक्ति प्रवर्द्धन र कन्सुलर सेवाको डिजिटाइजेशनलाई प्रमुख प्राथमिकतामा राखिएको बताएका छन्।

प्रतिनिधिसभामा विनियोजन विधेयकमाथिको छलफलमा जवाफ दिँदै उनले नेपालको अन्तर्राष्ट्रिय छवि र प्रतिष्ठा अभिवृद्धि गर्न सार्वजनिक कूटनीति प्रभावकारी बनाइने तथा द्विपक्षीय र बहुपक्षीय सम्बन्ध सुदृढ गरिने बताए। हाल नेपालका विश्वभर ४४ वटा कूटनीतिक नियोग रहेको र १८३ देशसँग कूटनीतिक सम्बन्ध स्थापना भएको जानकारी पनि उनले दिए।

आगामी आवका लागि परराष्ट्र मन्त्रालय तथा मातहत निकायका लागि ८ अर्ब ७३ करोड रुपैयाँ बजेट विनियोजन गरिएको छ, जसमा १ अर्ब ५५ करोड पुँजीगत र ७ अर्ब १८ करोड चालुतर्फ छुट्याइएको छ।

मन्त्री खनालले राहदानी तथा कन्सुलर सेवा थप सहज र प्रविधिमैत्री बनाउने, विदेशस्थित तीन नेपाली नियोगको भवन निर्माण गर्ने तथा श्रमिक उद्धार, कानुनी सहायता, शव फिर्ता, पर्यटन तथा सांस्कृतिक प्रवर्द्धनका कार्यक्रमलाई प्राथमिकतामा राखिएको बताए। साथै विदेशमा समस्यामा परेका नेपाली नागरिकको सुरक्षा, सहायता र उद्धारलाई सरकारले विशेष महत्व दिएको उल्लेख गरे।

प्रकाशित मिति: बिहीबार, असार ४, २०८३ १८:१०

प्रतिक्रिया दिनुहोस्