बेलायती प्रधानमन्त्री स्टार्मरद्वारा राजीनामाको घोषणा, सरकार र लेबर पार्टीमा नयाँ नेतृत्वकाे दौडधुप

अन्तर्राष्ट्रिय

गृहपृष्ठ
अन्तर्राष्ट्रिय

बेलायती प्रधानमन्त्री स्टार्मरद्वारा राजीनामाको घोषणा, सरकार र लेबर पार्टीमा नयाँ नेतृत्वकाे दौडधुप

क्यापिटल नेपाल सोमबार, असार ८, २०८३

तस्बिर, बीबीसी

काठमाडौं। बेलायती प्रधानमन्त्री कीर स्टार्मरले पद र लेबर पार्टीको नेतृत्व दुवैबाट राजीनामा दिने घोषणा गरेका छन्। १० डाउनिङ स्ट्रिटबाहिर राष्ट्रका नाममा सम्बोधन गर्दै उनले राजीनामाको घोषणा गरेको बीबीसीले जनाएको छ।

स्टार्मरले आफूले पदमा रहँदा गरेका हरेक निर्णय देशलाई पहिलो प्राथमिकतामा राखेर गरिएको बताए।

प्रधानमन्त्री स्टार्मरले आगामी निर्वाचनमा पार्टीको नेतृत्व गर्न आफू उपयुक्त पात्र हो कि होइन भन्ने प्रश्न पार्टीभित्र उठेको र सोही प्रश्नको उत्तरलाई स्वीकार्दै पद त्याग्ने निर्णय गरेको जानकारी दिए।

सन् २०२४ को जुलाईमा सत्ता सम्हाल्दा आफूले राजनीतिक र आर्थिक रूपमा निकै कमजोर अवस्थाको पार्टी पाएको स्मरण गर्दै उनले आफ्नो नेतृत्वमा सुदृढ बनेको धारणा व्यक्त गरे।

विशेषगरी पार्टीभित्र रहेको यहुदी विरोधी भावना (एन्टी–सेमिटिज्म) लाई निर्मूल पारेको र अर्थतन्त्र तथा राष्ट्रिय सुरक्षामा जनताको विश्वास पुनः स्थापित गरेको उनको भनाइ छ।

राजीनामाको औपचारिक घोषणा गर्नुअघि स्टार्मरले बकिङघम प्यालेसमा राजा चाल्र्सलाई आफ्नो निर्णय सुनाएका थिए। लेबर पार्टीको नयाँ नेतृत्व चयनका लागि आगामी जुलाई ९ देखि मनोनयन खुल्ने र संसदीय ग्रीष्मकालीन बिदाअगावै यो प्रक्रिया सम्पन्न हुने कार्यतालिका तय गरिएको छ।

सेप्टेम्बरमा संसद् पुनः सुरु हुनुअघि नै नयाँ नेता चुनिसक्ने लक्ष्य छ। त्यतिन्जेलसम्म स्टार्मर नै प्रधानमन्त्रीका रूपमा बहाल रहनेछन्। सम्बोधनका क्रममा प्रधानमन्त्री स्टार्मर निकै भावुकसमेत देखिएका थिए। लेबर पार्टीमा नयाँ नेतृत्वका लागि दौडधुप सुरु भएको बीबीसले लेखेको छ।–एजेन्सी

प्रकाशित मिति: सोमबार, असार ८, २०८३ १४:५२

प्रतिक्रिया दिनुहोस्