संसद् बैठकमा उठ्यो गणेश नेपाली आत्मदाह प्रकरण

राजनीति

गृहपृष्ठ
राजनीति

संसद् बैठकमा उठ्यो गणेश नेपाली आत्मदाह प्रकरण

क्यापिटल नेपाल शुक्रबार, असार २६, २०८३

काठमाडौं। बिहीबार त्रिपुरेश्वरमा आफ्नो शरीरमा पेट्रोल छर्किएर आत्मदाह प्रयास गरेका गणेश नेपालीको विषय प्रतिनिधिसभा बैठकमा पनि उठेको छ। प्रतिनिधिसभा बैठकको सुरुमै प्रमुख प्रतिपक्षी दल नेपाली कांग्रेसकी प्रमुख सचेतक वासना थापाले समय माग गरेर यो विषय उठाएकी हुन्।

वीर अस्पतालमा उपचाररत नेपालीको केही समयअघि निधन भइसकेको छ। सचेतक थापाले आत्मदाह घटनामा प्रधानमन्त्री बालेन्द्र शाहको मौनता किन भन्दै प्रश्न गरिन्। ‘हिजोको घटनामा तपाईंको मौनता किन प्रधानमन्त्रीज्यू, विपक्षमा हुँदा राज्यको सफलतामाथि कठोर प्रश्न उठाउने तपाईं आज सरकारको नेतृत्वमा हुँदा त्यही प्रश्नको जबाफ दिन किन टाढा हुनुहुन्छ?,’ उनको प्रश्न छ।

उनले २०७९ माघ १० गते प्रेम आचार्यले संसद् भवन नयाँ बानेश्वरअघि आत्मदाह गर्दा काठमाडौं महानगरका तत्कालीन मेयर बालेन शाहले लेखेको स्टाटस सम्झना छ कि छैन भनेर पनि सोधिन्। राज्य आतंकका कारण एक युवाले आफ्नो शरिरमा आगो सल्काउँदा राज्य मुकदर्शक भएको उनको भनाइ छ।

‘शरीर आयोगमा जलिरहेको छ, राज्यले एम्बुलेन्स पठाएन। बरु प्रहरी प्रशासन लगाएर अपराधीझैंं घिसारेर लग्यो,’ उनले भनिन्, ‘म सरकारलाई सोध्न चाहन्छु– यो उद्धार हो कि गिरफ्तारी?उसको गल्ती यही हो कि यो देशमा जन्मियो र यहीँ काम गर्यो।’

प्रकाशित मिति: शुक्रबार, असार २६, २०८३ १३:४८

प्रतिक्रिया दिनुहोस्