नेपाल व्यवसाय शिखर सम्मेलन आयोजना हुने

कर्पोरेट बजार

गृहपृष्ठ
कर्पोरेट बजार

नेपाल व्यवसाय शिखर सम्मेलन आयोजना हुने

क्यापिटल नेपाल शुक्रबार, वैशाख १५, २०८०

काठमाठाैं। यही वैशाख २४ गते ‘नेपाल व्यवसाय शिखर सम्मेलन, २०८०’ आयोजना हुने भएको छ। सरकार, बैंक तथा वित्तीय संस्था परिसंघ नेपाल (सिबिफिन) र नेपाल बिजनेस इन्स्टिच्युटले संयुक्तरुपमा उक्त सम्मेलन आयोजना गर्न लागेका हुन्।

‘अर्थतन्त्रका वर्तमान चुनौती तथा समृद्धिको मार्गचित्र’ मूल विषयवस्तु रहेको उक्त सम्मेलन काठमाडौंमा आयोजना गर्न लागिएको हो। शुक्रबार आयोजित पत्रकार भेटघाटमा उक्त सम्मेलनमा नेपालको वर्तमान आर्थिक एवम् बैंकिङ क्षेत्रका समस्या तथा त्यसको समाधानका उपायहरु माथि विचार विमर्श हुनेछ।

'हाल उद्योगी तथा व्यवसायीहरुको मनोबल निकै घटेको, विभिन्न कारणले मागमा सङ्कुचन आई उत्पादनमा असर परेको जस्ता समस्या समाधानका विषयमा सरोकारवाला व्यक्तिहरुको प्रस्तुति रहनेछ,' सिबिफिनका अध्यक्ष पवन गोल्यानले भने।

त्यस्तै चालू आर्थिक वर्षमा सरकारले लिएको लक्ष्यअनुसारको राजस्व संकलन नभएको, पुँजीगत खर्च अपेक्षित रुपमा हुन नसकेको र राष्ट्रिय तथा अन्तर्राष्ट्रिय परिवेशका कारण मूल्यवृद्धि बढिरहेको जस्ता कारणले समग्र अर्थतन्त्रमा नकारात्मक असर पारेको लगायत विषयमा पनि सम्मेलनमा छलफल हुने जनाइएको छ।

आर्थिक एवम् बैंकिङ सुधार तथा आत्मनिर्भर अर्थतन्त्रको भावी कार्यदिशा तय गर्न सम्मेलनबाट प्राप्त सुझाव समेटेर प्रतिवेदन तयार गरी सरकारलाई बुझाइनेछ।

प्रकाशित मिति: शुक्रबार, वैशाख १५, २०८० १७:१५

प्रतिक्रिया दिनुहोस्