दूधको माग घटेपछि ‘डेरी’ चलाउनै समस्या

उद्योग

गृहपृष्ठ
उद्योग

दूधको माग घटेपछि ‘डेरी’ चलाउनै समस्या

क्यापिटल नेपालबुधबार, फागुन ९, २०८०

दमक। झापामा दूध तथा दुग्धजन्य सामग्री उत्पादन एवं बिक्री गर्दै आएका (डेरी सञ्चालक) हरूले स्वदेशमा उत्पादन भएको धुलो दूधको माग घटेपछि व्यवसाय सञ्चालनमा समस्या भएको गुनासो गरेका छन्। स्थानीय किसानले उत्पादन गर्दै आएको गाईभैँसीको दूध संकलन गरी बजारीकरण गर्दै आएका साना तथा मझौला डेरी व्यवसायीले बिक्री नभएपछि किसानलाई भुक्तानी दिन नसक्ने अवस्थामा आफूहरू पुगेको दुखेसो गरेका हुन्।

विगत चार वर्ष अघिदेखि झापाको दमक–१० सेतुमारीमा डेरी सञ्चालन गर्दै आएका व्यवसायी विदुर भण्डारीले पछिल्ला केही दिनयता डेरी व्यवसायीले स्थानीयस्तरबाट संकलन गरेको दूधको भुक्तानी किसानलाई दिन कठिन भएको बताए। उनले २ सय किसानबाट दैनिक ५ सय लिटर दूध संकलन गर्दै आएको तर अहिले बजारबाट भुक्तानी नहुँदा समस्या भएको बताए। उनका अनुसार डेरीमा संकलन भएको दूध दमक बजारका साथै पोखराको सुजल डेरीले खरिद गर्दै आएको छ। तर केही दिनयता उक्त डेरीले बजारमा धुलो दूध बिक्री गर्न नसकेको भन्दै भुक्तानी नदिएपछि किसानलाई पशुआहाराको रूपमा प्रयोग गर्दै आएको दाना, चोकरसमेत दिन नसक्ने अवस्थामा डेरी सञ्चालक पुगेका छन्।

केही समय अघिमात्र दूधको मूल्यमा केही वृद्धि हुँदा निकै उत्साहित देखिएका किसान अहिले समयमा नै दूधको भुक्तानी पाउन नसक्दा निराश हुनुपरेको दमक–१० का गाईपालक किसान नवराज न्यौपानेले बताए। दुग्ध डेरी अहिले दूधका साथै दही, घिउ, पनिरलगायत दुग्धजन्य वस्तु उत्पादन तथा बिक्री गर्दै आएको छ। नेपाली बजारमा भारतीय उत्पादनले निकै प्रभाव जमाउँदै आइरहेको समयमा दूधको बजारमा पनि समस्या आएको व्यवसायीहरू बताउँछन्। भारतीय उत्पादनको लागत मूल्य कम हुनु र नेपाली उत्पादनको लागत मूल्य बढी भएकाले दूधको बजारमा समस्या भएको उनीहरूको बुझाइ छ। रासस

प्रकाशित मिति: बुधबार, फागुन ९, २०८० ०७:४०

प्रतिक्रिया दिनुहोस्