केही कम्पनीका सेयर मूल्यमा अस्वाभाविक वृद्धि : पूर्वअर्थमन्त्री महत

अर्थतन्त्र

गृहपृष्ठ
अर्थतन्त्र

केही कम्पनीका सेयर मूल्यमा अस्वाभाविक वृद्धि : पूर्वअर्थमन्त्री महत

क्यापिटल नेपाल सोमबार, साउन २१, २०८१

काठमाडौं । पूर्वअर्थमन्त्री एवं नेपाली कांग्रेसका नेता डा. प्रकाशशरण महतले केही कम्पनीका सेयर मूल्य अस्वाभाविक बढेको देखिएकाले त्यस्ता कम्पनीको सेयर कारोबारमा बदमासी भएकोबारे नियामकले अनुसन्धान गर्नुपर्ने बताएका छन्।

प्रतिनिधि सभाको आजको बैठकमा पूर्वअर्थमन्त्री महतले अहिले पुँजीबजारको वृद्धिलाई स्वभाविक रुपमा लिन नसकिने बताए। 'पछिल्लो समय शेयर बजारमा गति देखिएको छ । तर शेयर बजारमा जसरी ‘बुलिस ट्रेण्ड’ देखिएको छ, त्यसलाई हामीले सहजरुपमा लिनसक्ने अवस्था अवश्य छैन। त्यहाँ केहि चलखेलको सम्भावना प्रशस्त देखिएका छन्', उनले भने, 'कतिपय संस्थाको जसरी शेयर मूल्य बढेको छ, त्यो स्वभाविक देखिँदैन। ती संस्थाको क्षमता कति हो र आर्थिक अवस्था कस्तो छ? नाफा कति दिनसक्छ? भन्ने आधार नहेरिकनै मूल्य बढेको छ । यतातर्फ सरकार र नियामकको ध्यान जान जरुरी छ।'

पुँजीबजारमा केही व्यक्तिले ‘इन्साइडर ट्रेडिङ’ गरेको हुनसक्ने पूर्वअर्थमन्त्री महतले आशंका प्रकट गरे। 'कुनै कम्पनीको भित्री सूचना प्राप्त गरेर त्यसको दुरुपयोग गर्ने र आम लगानीकर्तालाई फस्ने परिस्थिति निर्माण हुन सक्दछ । केही त्यस्ता संस्थाको शेयर मूल्य बढेकोप्रति गम्भीर रुपमा हेर्न जरुरी छ', उनले भने।

नेपाल राष्ट्र बैंकको कहिले चाहिनेभन्दा लचक र कहिले चाहिनेभन्दा कसिलो मौद्रिक नीतिका कारण अर्थतन्त्रमा समस्या आएको धारणा महतको छ। यद्यपि पछिल्लो मौद्रिक नीतिले अर्थतन्त्रलाई चलायमान बनाउन मद्दत पुर्‍याउने उनले बताए। मौद्रिक नीतिमार्फत् राष्ट्र बैंकले बैंकदर र नीतिगत दर घटाएपनि पनि यसले ब्याजदर भने घट्ने नदेखिएको उनको भनाइ छ।

सार्वजनिक वित्त व्यवस्थापन र बजेट प्रणालीमा अनुशासन आवश्यक रहेको महतको धारणा छ।

प्रकाशित मिति: सोमबार, साउन २१, २०८१ १७:१२

प्रतिक्रिया दिनुहोस्