उद्योग

शतप्रतिशत भन्सार बढेपछि कोलकाता आइपुगेको सिंगल मल्ट उतै फर्काइयो

क्यापिटल नेपालबुधबार, जेठ २१, २०८२

काठमाडौं। सरकारले आर्थिक वर्ष २०८२/८३ को बजेटमा नेपाल आउने महँगा रक्सीको भन्सार महसल बढाएको छ। भन्सार महसुल शतप्रतिशत बढाइएपछि नेपाल आउने महँगा रक्सी ल्याउने वा नल्याउने दोधारमा नेपालका बिक्रेता छन्।

महँगो शुल्क पर्ने र त्यसमा पनि सरकारले शतप्रतिशत भन्सार बढाएपछि बिक्रेताहरु दोधारमा परिरहेका बेला नेपालका लागि आउँदै गरेको प्रिमियम म्याकल सिंगल मल्ट ह्वीस्की कोलाकताबाट उतै फर्काइएको हो। पानीजहाजमार्फत कोलकाता आइपुगेको सिंगल मल्टको भन्सार शतप्रतिशत बढेपछि नेपालमा बिक्री गर्न असम्भव रहेको निष्कर्ष निकाल्दै बिक्रेताले उतै फिर्ता पठाएको स्रोतले बताएको हो।

नेपालका लागि करिब ३ करोड रुपैयाँ बराबरको सिंगल मल्ट आइरहेको थियो। नेपाल आउँदा सो रकम बढेर ६ करोड पुग्ने भएपछि बिक्री सम्भव नहुँदा फिर्ता पठाएको जनाइएको छ।

हाल नेपालमा सिंगल मल्टको मूल्य प्रतिबोतल ४० हजार रुपैयाँ छ। शतप्रतिशत भन्सार बढ्दा एक बोतलकै ८० हजार पुग्ने भएपछि बिक्रेताले उतै पठाएका हुन्। सरकारले पछिल्लो केही वर्षदेखि मदिरामा बर्सेनि शतप्रतिशत भन्सार बढाउँदै आएको छ।

सरकारले निरन्तर रुपमा भन्सार बढाउँदा औपचारिक रुपमा बिक्री कम भए पनि चोरीका रक्सी धेरै आउने गरेको व्यवसायी बताउँछन्। ‘सरकारले औपचारिक रुपमा ल्याउनेलाई भन्सारमा कडाइ गरे पनि चोरी तस्करी रोक्न सकेको छैन,’ एक मदिरा व्यवसायीले भने, ‘यसबाट व्यवसायीलाई मात्र हैन, सरकारलाई समेत ठूलो घाटा परिरहेको छ, राजस्व गुमाइरहेको छ।’

शतप्रतिशत भन्सार बढाइएपछि नेपालमा महँगा मदिराको रुपमा बिक्री हुँदै आएका ब्लु लेबल र रोयल सेलुटको आयात रोक्ने तयारीमा बिक्रेता पुगिसकेका छन्।