कञ्चनपुर। शुक्लाफाँटा नगरपालिका १ बन्साहका गणेश पन्तको घरमा मंगलबार दिउँसो आगलागी हुँदा १५ लाख बढीको क्षति भएको छ। भान्सा कोठामा खाना पकाउन राखिएको ग्यास चुहावट भई आगलागी भएको हो।
इलाका प्रहरी कार्यालय झलारीका प्रहरी निरीक्षक राजेश बस्नेतका अनुसार आगलागीबाट घरभित्र र पसलभित्र राखिएको नगद एक लाख १० हजार, सुन, लत्ताकपडा, खाद्यान्न, फर्निचर, फ्रिजलगायतमा गरी १५ लाखको क्षति भएको छ।
आगलागी भएको जानकारी पाइएपछि नगरपालिकाको दमकलको सहायताले प्रहरी, नगर प्रहरी र स्थानीय बासिन्दाले आगलागीमाथि नियन्त्रण गरेको प्रहरी निरीक्षक बस्नेतले बताए। उनले समयमै आगलागी नियन्त्रण हुँदा मानवीय, पशुचौपायामा क्षति हुन नपाएको बताए।
वडाध्यक्ष उत्तरदेव भट्टका अनुसार आगलागी पीडित परिवारलाई वडाका तर्फबाट चामल, नुन तेल, दाल, चाउचाउ, भुजालगायत गरी पाँच हजार बरावरको सहयोग गरिएको छ।
नेपाल रेडक्रस सोसाइटी उपशाखा झलारीसँग समन्वय गरिएको उल्लेख गर्दै उनले भाँडाकुँडा, लत्ताकपडा उपलब्ध गराउनका लागि पहल गरिएको बताए। अहिले घरमा लागेको आगो नियन्त्रणमा आएको छ।
