ललितपुर। नेपालमै पहिलो पटक सुरु गरिएको ऐतिहासिक स्वरोजगार योजनाअन्तर्गत आज ललितपुरको भैँसेपाटीमा राइडरहरूलाई इलेक्ट्रिक स्कुटर (ईभी) वितरण गरिएको छ।
‘तपाईको बजार’, ‘इ ड्राइभ नेपाल’ र ‘परिमिता ग्रुप’को संयुक्त सहकार्यमा अघि बढाइएको योजनाको पहिलो चरणमा राइडरलाई विशेष 'फ्री अफर' पनि प्रदान गरिएको छ।
उद्घाटन समारोहमा अवकाश प्राप्त मेजर जेनेरल सुरेश कुमार कार्की, अवकाश प्राप्त एआइजी जनक भट्टराई, इ ड्राइभ नेपालका अध्यक्ष राजेश मास्के र योङ्यो नेपालका प्रमुख सन्तोष पाण्डेले संयुक्त रूपमा रिबन काटेर कार्यक्रमको उद्घाटन गरेका थिए।
कार्यक्रममा सहभागी राइडरलाई आजको दिन भाडा नलाग्ने विशेष फ्री अफर दिइएको हो। उनीहरूले ईभी स्कुटर प्राप्त गर्दै सुरुवातमै खर्च बिना काम गर्न पाउने अवसर पाएका छन्। जसले उनीहरूमा हौसला थपेको देखिएको छ।
ई ड्राइभ नेपालका अध्यक्ष राजेश मास्केले भने, 'आज हामीले पहिलो चरणमा इच्छुक र योग्य राइडरलाई ईभी स्कुटर वितरण गरिसकेका छौँ। उनीहरूलाई सुरुवातका लागि फ्री अफर प्रदान गरिएको छ। जसले उनीहरूलाई रोजगारी सुरु गर्न सहज बनाउने छ।'
ई ड्राइभ नेपाल कामुख्य कार्यकारी अधिकृत सबिन भट्टराईले थपे, 'राइडरले आजबाटै स्कुटर चलाएर आम्दानी सुरु गर्न सक्छन्। फ्री अफरले उनीहरूमा थप ऊर्जा र आत्मविश्वास पैदा गरेको छ।'
‘तपाईको बजार’का संचालक सुशील संग्रौलाले भने, 'ईभी वितरणको यो क्षण हाम्रो लागि गौरवको हो। यो केवल साधनको वितरण होइन, यो नेपाली युवाको भविष्यमा गरिएको लगानी हो।'
यस योजनाले विदेशी इन्धनको खर्च घटाउने, नेपालमै उत्पादित विद्युतको उपयोग बढाउने र स्वदेशी प्रविधिको प्रवर्द्धनमार्फत हरित यातायात प्रणालीको विकासतर्फ एक महत्वपूर्ण पाइला चालेको आयोजक संस्थाको विश्वास छ। साथै, यसले नेपाली युवालाई स्वदेशमै आत्मनिर्भर बन्न प्रेरणा दिने लक्ष्य लिएको छ।
