मध्यपहाडी लोकमार्गको सिन्धुली खण्ड अवरुद्ध, भैंसी बोकेको ट्रक लेदोमा फस्यो

पूर्वाधार

गृहपृष्ठ
पूर्वाधार

मध्यपहाडी लोकमार्गको सिन्धुली खण्ड अवरुद्ध, भैंसी बोकेको ट्रक लेदोमा फस्यो

क्यापिटल नेपाल शनिबार, साउन १७, २०८२

फाइल तस्बिर

सिन्धुली। मध्यपहाडी लोकमार्गअन्तर्गत सिन्धुली खण्ड आज बिहानैदेखि अवरुद्ध भएको छ। सडकमा पहिरो र लेदो थुप्रिएपछि लोकमार्ग अवरुद्ध भएको हो।

गोलञ्जोर गाउँपालिका–६ अकरेभिरमा लेदोका कारण लोकमार्ग अवरुद्ध भएको जिल्ला प्रहरी कार्यालय सिन्धुलीका प्रहरी नायब उपरीक्षक सूर्यप्रकाश सुवेदीले जानकारी दिए।

उनका अनुसार लोकमार्गको सडक खण्डमा राती परेको अविरल वर्षाको कारण ओखलढुंगाबाट काठमाडौंतर्फ जाँदै गरेको ११ वटा भैंसी लोड गरिएको ना७ख ७८९० नम्बरको ६ चक्के ट्रक हिलो माटो लेदोमा फसेको र ट्रक निकाल्ने पहल भइरहेको छ।

लोकमार्गका विभिन्न स्थानमा गरी तीन वटा ट्रक ‘होल्ड’ गरिएको छ।

गोलञ्जोर गाउँपालिका–६ कै बलेनीस्थित मध्यपहाडी लोकमार्गमा सडक माथिबाट पहिरो खसेर बाटो अवरोध भएको छ। सडक अवरुद्ध भएका कारण खुर्कोट घुर्मी सडक खण्डमा गुड्ने सवारीसाधन खुर्कोटमै रोकिएका छन्।

ओखलढुंगा, सोलुखुम्बु, भोजपुरलगायतका पूर्वी जिल्लाबाट राजधानी हिँडेका सवारीसाधनले केही समय कुर्नुपर्नेेछ।

सडकमा खसेको पहिरो र लोदो पन्छाउन पहल भइरहेको प्रहरीले बताएको छ। सिन्धुलीमा गए रातीदेखि निरन्तर वर्षा भइरहेको छ।

प्रकाशित मिति: शनिबार, साउन १७, २०८२ ०७:४७

प्रतिक्रिया दिनुहोस्