आईक्यानको दीक्षान्त, १४१ चार्टर्ड एकाउन्टेन्ट दीक्षित

प्रविधि

गृहपृष्ठ
प्रविधि

आईक्यानको दीक्षान्त, १४१ चार्टर्ड एकाउन्टेन्ट दीक्षित

क्यापिटल नेपाल शनिबार, माघ १७, २०८२

काठमाडौं। नेपाल चार्टर्ड एकाउन्टेन्टस् संस्था (आईक्यान)को आठौं दीक्षान्त काठमाडौंमा सम्पन्न भएको छ। महालेखापरीक्षक तोयम राया र राष्ट्रिय योजना आयोगका उपाध्यक्ष डा. प्रकाशकुमार श्रेष्ठ सहभागी कार्यक्रममा १४१ जना चार्टर्ड एकाउन्टेन्ट दीक्षित भएको आईक्यानले जनाएको छ।

दीक्षित चार्टर्ड एकाउन्टेन्टलाई रायाले दीक्षान्त प्रमाणपत्र हस्तान्तरण गरे। उनले सुशासनमार्फत राष्ट्र निर्माणमा योगदान गर्न चार्टर्ड एकाउन्टेन्टलाई आग्रह गरे। चार्टर्ड एकाउन्टेन्ट राष्ट्रको आर्थिक विकासका लागि आवश्यक विशिष्ट पेसा रहेको बताउँदै महालेखापरीक्षक रायाले नवदीक्षित चार्टर्ड एकाउन्टेन्टलाई शुभकामना दिए।

सार्वजनिक वित्त व्यवस्थापन, पारदर्शिता, आन्तरिक नियन्त्रण प्रणालीको सुनिश्चितता गर्न चार्टर्ड एकाउन्टेन्टस्को भूमिका महत्वपूर्ण हुने उनको भनाइ थियो।

आयोग उपाध्यक्ष डा. श्रेष्ठले यतिबेला सरकारी वित्त दबाबमा रहे पनि बाह्य क्षेत्र ठीक रहेको र मुद्रस्फीति पनि वाञ्छित सीमाभित्रै रहेकाले चिन्ता लिनुपर्ने अवस्था नरहेको बताए।