काठमाडौं। नेपाल उद्योग वाणिज्य महासंघको आसन्न निर्वाचनमा सागर ढकालले वस्तुगततर्फबाट केन्द्रीय सदस्यमा उम्मेदवारी घोषणा गरेका छन्। नेपाल स्टक ब्रोकर एसोसिएसनका अध्यक्ष ढकालले उक्त संस्थाको तर्फबाट महासंघको वस्तुगततर्फको केन्द्रीय सदस्यमा उम्मेदवारी घोषणा गरेका हुन्।
एसोसिएसनको कार्यसमिति बैठकले सर्वसम्मत अध्यक्ष ढकाललाई केन्द्रीय सदस्यमा उम्मेदवारी बनाउने निर्णय गरेको हो। एसोसिएसनको केही समयअघि बसेको कार्यसमिति बैठकले अध्यक्ष ढकाललाई केन्द्रीय सदस्य बनाउन भूमिका खेल्ने जानकारी दिएको छ।
नेपालको पुँजी बजारमा ७२ लाख बढी लगानीकर्ता आबद्ध रहेको र अबको अर्थतन्त्रको मेरुदण्डको रुपमा पुँजी बजारलाई सशक्त रुपमा अघि बढाउने उद्देश्यअनुरुप स्टक ब्रोकर एसोसिएसनबाट महासंघ केन्द्रीय कार्यकारी सदस्य पदमा उम्मेदवारी दिएको अध्यक्ष ढकालले बताए।
‘अहिले पुँजी बजारमा ७२ लाख बढी लगानीकर्ता आबद्ध छन् भने पुजीबजारको मार्केट क्याप करिब ५० खर्ब हाराहारी छ,’ उनले भने, ‘यसलाई नेपालको पुँजी बजार मात्र नभई समग्र अर्थतन्त्रको ऐनाको रूपमा अघि बढाउनुपर्छ। समग्र लगानीकर्ता र नेपालको पुँजी बजारलाई मुख्य रूपमा अघि बढाउनकै लागि मैले महासंघको आसन निर्वाचनमा संस्थाको तर्फबाट केन्द्रीय सदस्यमा उम्मेदवारी घोषणा गरेको हुँ।’
करिब दुई वर्षदेखि नेपालको पुँजी बजारमा आबद्ध अध्यक्ष ढकाल पुजीबजारका साथै जलविद्युत, होटल पर्यटन, कृषिलगायत क्षेत्रमा आबद्ध छन्। आफू महासंघ केन्द्रीय कार्यसमितिमा गएर नेपालका उद्योगी व्यवसायीको समस्या समाधानका लागि सरकारसँग नीतिगत लबिङमा लाग्ने समेत उनले जानकारी दिए।
‘अहिले पुँजी बजारका साथै नेपालका उद्योग व्यवसायमा धेरै समस्या छन्,’ उनले भने, ‘सरकारले ती समस्या समाधान गर्न आलटाल गर्दै आएको छ। जेनजी आन्दोलनपछि दुई तिहाइको नयाँ सरकार बन्ने क्रममा रहेको र अब बन्ने सरकारलाई व्यवसायीका समस्या समाधान गरी माग सम्बोधन गराउनका लागि पनि मैले महासंघ केन्द्रीय सदस्यमा उम्मेदवारी दिएको हुँ।’
