लगातार तीन दिन व्यस्त रहनेछ शीतलनिवास, कार्यवाहक सभामुखदेखि प्रधानमन्त्रीसम्मको शपथ तालिका

राजनीति

गृहपृष्ठ
राजनीति

लगातार तीन दिन व्यस्त रहनेछ शीतलनिवास, कार्यवाहक सभामुखदेखि प्रधानमन्त्रीसम्मको शपथ तालिका

क्यापिटल नेपाल मंगलबार, चैत १०, २०८२

फाइल तस्बिर

काठमाडौं। चैत ११ देखि नयाँ सरकार गठन प्रक्रिया सुरु हुँदै छ। फागुन २१ को निर्वाचनपछि नयाँ सरकार गठन प्रक्रियास्वरुप चैत ११ देखि लगातार ३ दिन राष्ट्रपति भवन शीतलनिवास र संसद् सचिवालय व्यस्त हुनेछन्।

सुरुमा सभामुख नियुक्त नहुन्जेल ज्येष्ठ सदस्य सांसदले शपथ लिनेछन् भने त्यसपछि उनले सांसदलाई शपथ खुवाउनेछन्। ३ दिनभित्र शपथ लिनेमा प्रधानमन्त्रीदेखि व्यवस्थापिका प्रमुख र व्यवस्थापिकाका सदस्यसम्म छन्।

बुधबार राष्ट्रपति रामचन्द्र पौडेलले शीतलनिवासमा फागुन २१ गते सम्म प्रतिनिधिसभा निर्वाचनबाट निर्वाचित २७५ सांसद मध्यका ज्येष्ठ सदस्य नेपाली कांग्रेसका सांसद अर्जुननरसिंह केसीलाई पद तथा गोपनीयताको शपथ दिलाउने कार्यक्रम तय भएको छ। उनको शपथ बिहान सवा ११ बजे हुने तय भएको राष्ट्रपति कार्यालयले जनाएको छ।

केसीले प्रतिनिधिसभामा निर्वाचित बाँकी २७४ सांसदलाई चैत १२ गते बिहीबार दिउँसो २ बजे सिंहदरबार पुतली बगैंचामा निर्मित बहुउद्देश्यीय हलमा पद तथा गोपनीयताको शपथ खुवाउने संघीय संसद् सचिवालयका प्रवक्ता एकराम गिरीले बताए।