ऊर्जा क्षेत्रलाई आर्थिक रूपान्तरणको मुख्य आधार बनाइएको छ : मन्त्री श्रेष्ठ

अर्थतन्त्र

गृहपृष्ठ
अर्थतन्त्र

ऊर्जा क्षेत्रलाई आर्थिक रूपान्तरणको मुख्य आधार बनाइएको छ : मन्त्री श्रेष्ठ

क्यापिटल नेपाल बिहीबार, असार ४, २०८३

काठमाडौं। ऊर्जा, जलस्रोत तथा सिँचाइमन्त्री विराजभक्त श्रेष्ठले आगामी आर्थिक वर्षको बजेटमार्फत ऊर्जा क्षेत्रलाई आर्थिक रूपान्तरणको मुख्य आधारका रूपमा अघि बढाइएको बताएका छन्।

प्रतिनिधिसभामा विनियोजन विधेयकमाथिको छलफलमा जवाफ दिँदै उनले ऊर्जा मन्त्रालयका लागि १ खर्ब १४ अर्ब २ करोड रुपैयाँभन्दा बढी बजेट विनियोजन गरिएको जानकारी दिए। सरकारले आगामी वर्षभित्र १ हजार ४० मेगावाट विद्युत् राष्ट्रिय प्रसारण प्रणालीमा थप्ने तथा १० वर्षमा ३० हजार मेगावाट जडित क्षमता पुर्‍याउने लक्ष्य लिएको उनले बताए।

मन्त्री श्रेष्ठका अनुसार १२ वटा रणनीतिक महत्वका प्रसारण लाइन निर्माण सम्पन्न गर्ने योजना रहेको छ भने उत्पादनभन्दा प्रसारण र वितरण प्रणाली सुदृढीकरणलाई प्राथमिकता दिइएको छ। राहुघाट, तनहुँ जलाशययुक्त, माथिल्लो त्रिशूली–३बी लगायतका आयोजनालाई उच्च प्राथमिकता दिइएको छ।

उनले ऊर्जा व्यापारमा पहिलोपटक उदारीकरणको नीति अपनाइएको उल्लेख गर्दै निजी क्षेत्रलाई राष्ट्रिय तथा अन्तर्राष्ट्रिय बजारमा विद्युत् व्यापार गर्न बाटो खुला गरिएको बताए। साथै, सिँचाइतर्फ थप १५ हजार ७७६ हेक्टर जमिनमा सुविधा विस्तार गरी सिञ्चित क्षेत्रको अनुपात ६४ प्रतिशत पुर्‍याउने लक्ष्य राखिएको जानकारी दिए।