‘इरान र अमेरिकाबीच शुक्रबार हुने भनिएको हस्ताक्षर समारोह रद्द’

अन्तर्राष्ट्रिय

गृहपृष्ठ
अन्तर्राष्ट्रिय

‘इरान र अमेरिकाबीच शुक्रबार हुने भनिएको हस्ताक्षर समारोह रद्द’

क्यापिटल नेपाल बिहीबार, असार ४, २०८३

काठमाडौं। इरान र अमेरिकाबीच शुक्रबार हुने तय भएको हस्ताक्षर समारोह रद्द गरिएको छ। पाकिस्तानका उपप्रधानमन्त्री तथा परराष्ट्रमन्त्री इसहाक डारले स्विट्जरल्यान्डको जेनेभामा आयोजना हुने उक्त समारोह रद्द गरिएको जानकारी दिएका हुन्।

उनले बीबीसी उर्दूसँग कुरा गर्दै समझदारीपत्रमा दूरसञ्चार माध्यममार्फत नै हस्ताक्षर भइसकेकाले समारोह आवश्यक नरहेको र त्यसैले रद्द गरिएको बताएका छन्। यसअघि पाकिस्तानका एक वरिष्ठ अधिकारीले प्रधानमन्त्री शहबाज शरीफको जेनेभा भ्रमण पनि स्थगित गरिएको जानकारी दिएका थिए।

समारोहबारे प्रश्न उठ्न थालेपछि शहबाज शरीफले सामाजिक सञ्जाल एक्समा गरेको आफ्नो पोस्टमा संशोधन गरेका थिए। उनले उक्त पोस्टबाट “पाकिस्तानले सह–मध्यस्थ कतारको सहयोगमा सन् २०२६ जुन १९ मा स्विट्जरल्यान्डमा निर्धारित कार्यक्रमअनुसार औपचारिक समारोह आयोजना गर्नेछ” भन्ने अंश हटाएका थिए।

पाकिस्तानमा पर्दापछाडि विभिन्न तहमा छलफल चलिरहेका बेला स्रोतहरूले बिहानसम्म कार्यक्रम पूर्वनिर्धारित योजनाअनुसार नै हुने बताएका थिए। तर साँझसम्म परिस्थिति परिवर्तन भई समारोह रद्द गर्ने निर्णय गरिएको हो।