×

खाद्यान्न अभावसँगै ९७ प्रतिशत अफगानी गरिबीको रेखामुनि

images

एजेन्सी। खाद्यान्न अभावसँगै ९७ प्रतिशत अफगान जनता गरिबीको रेखामुनि बाँचिरहेका एक सर्वेक्षणले देखाएको छ। तालिबानले गत वर्ष देशको शासनसत्ता कब्जा गरेपछि अर्थतन्त्रमा गम्भीर चुनौती उत्पन्न भई खाद्यान्न अभाव बढेको छ। 

आप्रवासनका लागि अन्तर्राष्ट्रिय संगठन (आईओएम) द्वारा युरोपेली संघसँगको साझेदारी र  समन्वयमा जारी गरिएको सर्वेक्षणअनुसार अफगानिस्तानको ९७ प्रतिशत जनसंख्या गरिबीको रेखामुनि धकेलिएको छ। बिजुली कटौतीका कारण देशका प्रमुख सहरको अर्थतन्त्रमा प्रभाव परेको, विद्युत् अभावमा धेरै कारखाना बन्द भएका तथा रोजगारीका सीमित अवसरमा पनि प्रभाव परेको छ। 

खडेरी र कमजोर शासनको परिणाम स्वरूप अफगानिस्तानको आधा भन्दा बढी जनसंख्याले गम्भीर खाद्यान्न अभावको झेलिरहेको छ। सर्वेक्षणले गरिबीका कारण अफगानीको जीविकोपार्जनमा नकारात्मक असर परेको, ग्रामीण क्षेत्रका धेरै मानिसलाई उनीहरूको स्रोत विविधीकरणमा पर्याप्त उपलव्ध नभएको तथा करिब ६० प्रतिशत जनसंख्या जलवायु आघातबाट पीडित  भएका देखाएको छ। 

यसैबीच, विश्व खाद्य कार्यक्रम (डब्ल्युएफपी) ले पनि अफगानिस्तानको आर्थिक संकटलाई लिएर गम्भीर चिन्ता व्यक्त गरेको छ। व्याप्त आर्थिक संकटले देशभरका परिवार र समुदायको जीविकोपार्जनमा समस्या भएको उसले बताएको छ।

डब्ल्युएफपीले साना उद्यममा असर परेको, निजी कम्पनीले बिक्रीमा भएको कमी, उत्पादन र उपभोक्ता मागमा आएको विशाल गिरावटका कारण आधाभन्दा बढी कर्मचारी कटौती गरिएको जनाएको छ। लाखौँ अफगानी भोकमरीको चपेटामा पर्नसक्ने जनाउँदै उक्त संस्थाले मानवीय संकटबाट अफगानिस्तानलाई जोगाउन अन्तर्राष्ट्रिय समुदायले सहयोग गर्नुपर्नेमा जोड दिएको छ। 

बुधबार १४ मंसिर २०७९ ०४:४२ PM मा प्रकाशित

प्रतिक्रिया