रुरु हाइड्रोको आईपीओ बाँडफाँड, १५ लाख ५२ हजारले पाएनन्

मुख्य समाचार

गृहपृष्ठ
मुख्य समाचार

रुरु हाइड्रोको आईपीओ बाँडफाँड, १५ लाख ५२ हजारले पाएनन्

क्यापिटल नेपालशुक्रबार, वैशाख ३, २०७८

काठमाडौं । रुरु जलविद्युत् परियोजना लिमिटेडले सर्वसाधारणका लागि जारी गरेको प्राथमिक सेयर (आईपीओ) बाँडफाँड भएको छ । बिक्री प्रबन्धक एनएमबी क्यापिटलले आज बिहान रुरु जलविद्युत् परियोजनाले निष्काशन गरेको आइपिओ बाँडफाँड गरेको हो ।

कम्पनीले गत चैत २० गतेदेखि सर्वसाधारणका लागि खुला गरेको आईपीओ १६ लाख ८३ हजार १२१ आवेदकबाट २ करोड ३५ लाख ४६ हजार ४४० कित्ताको लागि आवेदन परेको थियो । आवेदन दिएकामध्येबाट योग्य कायम भएका १५ लाख ९० हजार ८९६ आवेदकलाई गोलाप्रथामा समावेश गरेर सेयर बाँडफाँट भएको छ ।

योग्य आवेदकमध्ये गोलाप्रथाबाट ३७ हजार ९१६ लगानीकर्ताले १० कित्ताका दरले सेयर पाएको एनएमबी क्यापिटलका प्रमुख कार्यकारी अधिकृत श्रीजेश घिमिरेले जानकारी दिए । रीतपूर्वक आवेदन दिएकामध्ये पनि १५ लाख ५२ हजार बढीको हात खाली भएको छ ।

प्रिमियम मूल्यमा सेयर निष्काशन गरेको कम्पनीले अङ्कित मूल्यमा २० प्रिमियम थप गरेर प्रतिकित्ता १२० रुपैयाँमा सेयर बिक्री गरिएको थियो । कम्पनीले ४ लाख ७ हजार ७०६ कित्ता आईपीओ सर्वसाधारणका लागि खुला गरेको थियो । यसमध्ये ८ हजार १५४ कित्ता कम्पनीका कर्मचारीलाई र २० हजार ३८५ कित्ता सामूहिक लगानी कोषलाई छुट्याएको थियो ।

यसअघि गत फागुन ७ गतेदेखि आयोजना प्रभावित स्थानीयवासीको लागि ४ लाख ७ हजार ७०५ कित्ता सेयर निष्काशन गरेको थियो । आईपीओको नतीजा मेरो सेयर, सिडिएसले आईपीओ नतीजाको लागि तयार पारेको वेबसाइट र बिक्री प्रबन्धक एनएमबी क्यापिटलको वेबसाइटबाट हेर्न सकिने छ ।

प्रकाशित मिति: शुक्रबार, वैशाख ३, २०७८ १२:४७

प्रतिक्रिया दिनुहोस्