विदेशी पर्यटकलाई अनअराइभल भिसा खुल्यो, क्वारेन्टाइनको व्यवस्था हटेन

पर्यटन

गृहपृष्ठ
पर्यटन

विदेशी पर्यटकलाई अनअराइभल भिसा खुल्यो, क्वारेन्टाइनको व्यवस्था हटेन

क्यापिटल नेपालबिहीबार, असोज ७, २०७८

काठमाडौं । नेपाल आउने विदेशी पर्यटकलाई अनअराइभल भिसा खुला भएको छ । संस्कृति, पर्यटन तथा नागरिक उड्डयन मन्त्रालयले मन्त्रिपरिषदमा पेश गरेको विदेशबाट नेपाल आगमन हुने र नेपालबाट प्रस्थान गर्ने यात्रुहरुको यात्रा व्यवस्थापनसम्बन्धी आदेश २०७८ स्वीकृत गर्दै २ वर्षअघिदेखि रोकिएको अनअराइभल भिसा खुला गरेको हो ।

कोभिड-१९ विरुद्धको खोपको मात्रा पूरा गरेको १४ दिन पूरा भएको प्रमाण, हवाई उडानका लागि चेक इन हुनुभन्दा ७२ घण्टाभित्रको कोभिड परीक्षणको रिपोर्ट नेगेटिभको भएको प्रमाण, पर्वतारोहण र पदयात्रा तथा अनुमति लिनुपर्ने अन्य विषयको हकमा सोसम्बन्धी अनुमतिको प्रतिलिपी र नेपालमा होटल बुक गरेको प्रमाणका आधारमा अनअराइभल भिसा दिने भएको हो ।

योसँगै पर्यटन व्यवसायीहरुले लामो समयदेखि माग गर्दै आएको क्वारेन्टाइनको व्यवस्था भने यथावत छ । विदेशी नागरिकले नेपाल प्रवेश गरेपछि पालना गर्नुपर्ने शर्तहरु राख्दै (१) दफा ३ को उपदफा (३) बमोजिमका विदेशी नागरिक अनिवार्य रुपमा १० दिन आफ्नै खर्चमा होटल क्वारेन्टाइनमा बस्नुपर्ने उल्लेख गरेको छ ।

यस्तै नेपाली नागरिक वा गैरआवासीय नेपाली नागरिक नेपाल फर्कंदा वा आउँदा पालना गर्नुपर्ने यात्राका शर्तहरुमा भने कोभिड-१९ विरुद्धको खोपको मात्रा पूरा गरेको १४ दिन पूरा भएका विदेशमा बसोबास गरिरहेका वा विदेश भ्रमणमा रहेका वा वैदेशिक रोजगारीमा गएका नेपाली नागरिक नेपाल फर्कंदा वा नेपाल आउँदा हवाई उडानमा चेक इन हुनुभन्दा ७२ घण्टा भित्रको कोभिड-१९ परीक्षणको रिपोर्ट भएको प्रमाणपत्र साथमा राख्नु पर्नेछ । त्यस्ता व्यक्ति नेपाल प्रवेश गर्दा कोभिड-१९ को लक्षण वा चिह्रन नभएमा गन्तव्यमा जान अनुमति दिइने उल्लेख छ ।