अर्थतन्त्रमा सुधार आउन थालेको छ : उद्योग मन्त्री भण्डारी

उद्योग

गृहपृष्ठ
उद्योग

अर्थतन्त्रमा सुधार आउन थालेको छ : उद्योग मन्त्री भण्डारी

क्यापिटल नेपाल बिहीबार, वैशाख ६, २०८१

काठमाडौं। उद्योग, वाणिज्य तथा आपूर्तिमन्त्री दामोदर भण्डारीले केही समयदेखि अर्थतन्त्रमा देखिएको शिथिलतामा सुधार आउन थालेको बताएका छन्।

नेपाल चार्टर्ड एकाउन्टेन्ट्स संस्थाले आयोजना गरेको ‘सस्टेनेबल अकाउन्टिङ प्राक्टिसेस’ विषयक तेस्रो राष्ट्रिय लेखा व्यवसायी सम्मेलनको उद्घाटन समारोहमा उनले अर्थतन्त्रका केही परिसूचक सुधारोन्मुख रहेको वर्तमान अवस्थामा व्यापार व्यवसाय तथा स्वदेशी उद्योग धन्दा विकासको माध्यमबाट अर्थतन्त्रलाई अझ चलायमान बनाउन आवश्यक देखिएको बताए।

'सक्षम अर्थतन्त्रको विकासका लागि उद्योगी व्यवसायीहरुको आत्मबल बढाउँदै नयाँ आर्थिक अवसरको सिर्जना गर्न आवश्यक देखिएको छ,' उनले भने, 'यसले एकातिर अर्थतन्त्रमा सकारात्मक सन्देश प्रवाह गर्छ भने अर्कोतिर देशभित्रै रोजगारीका अवसर सिर्जना हुन्छ, यस कार्यमा लेखा व्यवसायी त्यसमा पनि नेपाल चार्टर्ड एकाउन्टेन्ट्स संस्थाको भूमिका अझ महत्त्वपूर्ण हुने मैले विश्वास लिएको छु।'

उनले विश्वमा कतिपय सफल मानिएका व्यवसाय गलत लेखांकन र लेखाका सर्वमान्य सिद्धान्तको प्रयोग नगरिँदा सदाका लागि व्यवसाय बन्द गर्नुपरेको उदाहरण दिँदै गलत लेखांकनले देशको अर्थतन्त्रलाई प्रत्यक्ष नकारात्मक असर पर्ने उल्लेख पनि गरे।

आर्थिक क्षेत्रको विकासबिना देशको समग्र विकास सम्भव नहुने उल्लेख गर्दै मन्त्री भण्डारीले आर्थिक विकासमा लेखा व्यवसायीको अहम् एवं प्रत्यक्ष भूमिका रहने बताए।

प्रकाशित मिति: बिहीबार, वैशाख ६, २०८१ १३:५४

प्रतिक्रिया दिनुहोस्