प्राधिकरण स्वदेशी उद्योगलाई विद्युत् नदिएर निर्यातकर्ता बन्न खोजेकामा सीएनआई चिन्तित

उद्योग

गृहपृष्ठ
उद्योग

प्राधिकरण स्वदेशी उद्योगलाई विद्युत् नदिएर निर्यातकर्ता बन्न खोजेकामा सीएनआई चिन्तित

क्यापिटल नेपाल शुक्रबार, जेठ १८, २०८१

काठमाडौं। नेपाल उद्योग परिसंघ (सीएनआई)ले स्वदेशी उद्योगमा लोडसेडिङ यथावत राख्दै विद्युत् प्राधिकरणले विद्युत् निर्यात गरेको विषयप्रति ध्यानाकर्षण भएको जनाएको छ।

प्राधिकरणले औद्योगिक क्षेत्रमा दैनिक १२ घन्टा लोडसेडिङ गर्दै आए पनि सोमबारदेखि दैनिक ४०० मेगावाट विद्युत् निर्यात गरेको समाचार क्यापिटलनेपाललगायत सञ्चार माध्यममा प्रकाशित भएपछि परिसंघले आफ्नो धारणा सार्वजनिक गरेको हो।

सरकारले स्वदेशी उद्योग प्रवर्द्धन गर्ने, निजी क्षेत्रको मनोबल बढाउन प्रयासरत रहेको बताइरहदा सरकारी निकाय प्राधिकरणले स्वदेशी उद्योगलाई मारेर विद्युत् निर्यात घोषणा गरेकामा परिसंघले चिन्ता व्यक्त गरेको छ।

‘विद्युत् उत्पादन कम हुँदा आयात गरेरै भए पनि उद्योगलाई बिजुली उपलब्ध गराउन आग्रह गर्दैै आएका थियौं। तर, प्राधिकरणले विद्युत् आयात गर्दा महँगो पर्ने तर्क गर्दै आयात गरेन। त्यसको मारमा विगत तीन महिनादेखि उद्योगहरु पर्दै आएका छन्। अहिले विद्युत बचत हुँदा पनि उद्योगलाई पर्याप्त उपलब्ध नगराई निर्यात गरिनु प्राधिकरणले आफूलाई ‘खुद निर्यातकर्ता’ देखाउन खोजेको पुष्टि हुन्छ’, परिसंघले शुक्रबार निकालेको विज्ञप्तिमा भनिएको छ।

प्राधिकरणले नेपालमा सञ्चालित उद्योगले बिजुली मागेजति नदिने तर निर्यात गरेर आम्दानी देखाउनेतर्फ ध्यान दिएको देखिएको ठहर परिसंघको छ। उद्योगलाई पर्याप्त विद्युत् उपलब्ध गराएर बचत रहेको बिजुली मात्रै निर्यात गर्न परिसंघले माग गरेको छ।

प्रकाशित मिति: शुक्रबार, जेठ १८, २०८१ १४:२५

प्रतिक्रिया दिनुहोस्