सीमावर्ती क्षेत्रमा कोरोना देखिएपछि वीरगञ्ज नाकामा सतर्कता, हेल्थ डेस्कबाट स्वास्थ्य परीक्षण

समाज

गृहपृष्ठ
समाज

सीमावर्ती क्षेत्रमा कोरोना देखिएपछि वीरगञ्ज नाकामा सतर्कता, हेल्थ डेस्कबाट स्वास्थ्य परीक्षण

क्यापिटल नेपाल मंगलबार, जेठ २०, २०८२

पर्सा। छिमेकी भारतमा कोभिड संक्रमितको संख्या बढेसँगै सीमावर्ती बजार वीरगन्जमा पनि सतर्कता अपनाउन थालिएको छ। भारतबाट स्थलमार्ग र रेल्वेमार्ग हुँदै वीरगञ्ज प्रवेश गर्ने यात्रुमाथि स्वास्थ्य जाँच थालिएको हो।

पर्साको जिल्ला स्वास्थ्य संकट व्यवस्थापन समितिको जेठ १५ को बैठकले कोभिडको सम्भावित जोखिमलाई दृष्टिगत गर्दै सीमानाकामा स्वास्थ्य जाँचलाई प्रभावकारी बनाउने निर्णय गरेको छ।

वीरगन्ज महानगरका प्रमुख राजेशमानसिंह वीरगन्ज नाकामा स्थापना गरिएको सहायता कक्ष (हेल्थ डेस्क)को सोमबार निरीक्षण गर्दै छिमेकी भारतमा कोभिडका सङ्क्रमितको वृद्धि भएकाले नाका प्रदेशमा सतर्कता अपनाउन जरुरी रहेको बताए। ‘छिमेकी मुलुकमा बढ्दै गएको कोभिड संक्रमणलाई ध्यान दिँदै यहाँ फैलन नदिन विशेष सर्तकता अपनाउन थालिएको हो’, उनले भने, ‘नाकामा स्थापना गरिएको हेल्थ डेस्कलाई अझै प्रभावकारी बनाउने प्रयास भइरहेको छ।’

महानगरका अनुसार हेल्थ डेस्कमा मास्क, स्यानिटाइजर, तापक्रम मापन गर्ने उपकरणलगायत सामग्री व्यवस्थापन गरिएको छ। स्वास्थ्यकर्मी इब्राना खातुनले रक्सौलबाट आउने प्रत्येक व्यक्तिको तापक्रम जाँच अनिवार्य गरिएको बताइन्। उनका अनुसार यहाँ सञ्चालित हेल्थ डेस्कमा सात जना स्वास्थ्यकर्मी खटिएका छन्।

प्रकाशित मिति: मंगलबार, जेठ २०, २०८२ ०६:४१

प्रतिक्रिया दिनुहोस्