सीजी नेटको सेवा सुचारु, ९० प्रतिशत ग्राहकमा पहुँच

प्रविधि

गृहपृष्ठ
प्रविधि

सीजी नेटको सेवा सुचारु, ९० प्रतिशत ग्राहकमा पहुँच

क्यापिटल नेपाल शुक्रबार, भदौ २७, २०८२

काठमाडौं। जेनजी आन्दोलनमा भएको आगजनीबाट प्रभावित व्यापारिक घराना चौधरी समूह (सीजी ग्रुप) को सीजी नेटको सेवा पुनः सुचारु भएको छ। कम्पनीका अनुसार अहिले ९० प्रतिशत बढी ग्राहकले इन्टरनेट सेवा प्रयोग गरिरहेका छन्।

सीजीका प्राविधिक विभाग प्रमुख रन्नु शर्माका अनुसार कम्पनीका कुल ८० हजार ग्राहकमध्ये ७१ हजार ग्राहकले अहिले नियमित इन्टरनेट चलाइरहेका छन्। ‘हाम्रो प्रयास आज बेलुकासम्म सेवालाई पूर्ण रूपमा सामान्य बनाउने हो,’ उनले भने, ‘यदि ढिलो भए आउँदो आइतबारसम्म सबै ग्राहकलाई सेवा सुचारु गरिनेछ।’

आगलागीका कारण सतुंगल क्षेत्रको डेटा सेन्टरमा क्षति पुगेकाले सो क्षेत्रमा इन्टरनेट सेवा पूर्ण रूपमा अवरुद्ध छ। काठमाडौँ उपत्यका बाहिरको नवलपरासीमा रहेको डेटा सेन्टरबाट देशभरको सेवा सञ्चालन भइरहेको छ।

कम्पनीको देशभर काठमाडौं बाहिर १८ ठाउँमा डेटा सेन्टर छन्। उपत्यकामा एक ठाउँमा डेटा सेन्टर गरी १९ वटा रहेको कम्पनी जनाएको छ।

कम्पनीका कतिपय ठाउँमा इन्टरनेटको गति केही सुस्त भएको गुनासो आएको छ। ‘अहिलेको अवस्थामा केही ग्राहकले गतिमा कमी महसुस गर्न सक्छन्, तर यो अस्थायी हो र छिट्टै समाधान गरिनेछ,’ उनले भने।

आगलागीबाट भएको क्षति र सडक आउजाउमा देखिएको समस्याका कारण केही ग्राहकको घरमा पुगेर प्राविधिक सहयोग गर्न समस्या भएको कम्पनीले बताएको छ।

प्रकाशित मिति: शुक्रबार, भदौ २७, २०८२ १२:२८

प्रतिक्रिया दिनुहोस्