काठमाडौं। चीनको अटो उद्योग २०२५ मा ऐतिहासिक उच्चतामा पुग्ने संकेत देखिएको छ। सोहीअनुसार घरेलु बिक्री र निर्यात दुवै तेज गतिमा बढ्दै गइरहेको छ।
चाइना एसोसिएसन अफ अटोमोबाइल म्यानुफ्याक्चरर्स (काम)का उप–महासचिव छेन सुका अनुसार आगामी वर्ष चीनमा सवारीसाधनको कुल बिक्री ३४ मिलियन युनिट नाघ्नेछ, जसमा करिब १६ मिलियन युनिट नयाँ ऊर्जा सवारीसाधन( ईभी) हुने अनुमान गरिएको छ।
यससँगै चीनबाट निर्यात हुने सवारीसाधनको मात्रा पनि अभूतपूर्व हुने प्रक्षेपण गरिएको छ। कामका अनुसार २०२५ मा चीनको अटो निर्यात ६.८ मिलियन युनिटभन्दा बढी पुग्न सक्छ। गत वर्षमा निर्यातमा निरन्तर वृद्धि भइरहेको छ। २०२४ मा ५.८६ मिलियन, २०२३ मा ४.९१ मिलियन, र २०२२ मा ३.११ मिलियन युनिट गाडी विदेश पठाइएको थियो।
२०२५ को पहिलो १० महिनामै ५.६२ मिलियन सवारीसाधन निर्यात भइसकेको छ, जुन अघिल्लो वर्षको सोही अवधिसँग तुलना गर्दा १५.७ प्रतिशतले वृद्धि भएको हो।
चिनियाँ गाडीको बढ्दो अन्तर्राष्ट्रिय माग, नयाँ ऊर्जा सवारीसाधनप्रतिको आकर्षण, विदेशमा विस्तार हुँदै गएको वितरण सञ्जाल र ठूलो मात्राको उत्पादन क्षमताले निर्यात वृद्धिमा उल्लेखनीय योगदान दिएको छ।
२०२५ का पहिलो १० महिनामा मात्रै चीनले ७९८.३९ अर्ब युआन (करिब ११२.८ अर्ब अमेरिकी डलर) बराबरका सवारीसाधन निर्यात गरेको छ, जुन वार्षिक आधारमा १४.३ प्रतिशत वृद्धि हो।
घरेलु बजार पनि समान रूपमा सशक्त देखिएको छ। पहिलो १० महिनामा चीनको कुल सवारी उत्पादन २७.७ मिलियन युनिट पुगेको छ, जुन अघिल्लो वर्षको तुलनामा १३.२ प्रतिशत उच्च हो। उत्पादन र बिक्री दुवै बढिरहेका कारण चीनमा बनेका गाडीहरू निर्यातको हिस्सा दिनानुदिन ठूलो बन्दै गएको ऋब्ब्ः ले जनाएको छ।
यदि २०२५ का लागि गरिएको प्रक्षेपण सही रह्यो भने चीनले यस वर्ष करिब ७ मिलियन सवारीसाधन विदेश पठाउनेछ, जसले चीनलाई विश्वकै सबैभन्दा ठूलो सवारीसाधन निर्यातकर्ता राष्ट्रका रूपमा पुनः स्थापित गर्नेछ। यो कीर्तिमान चीनले पहिलोपटक २०२४ मा हासिल गरेको थियो।
