काठमाडौं। ओमान तट नजिक अमेरिकाले प्रहार गरेको व्यापारिक जहाजमा सवार तीन भारतीय नाविकको मृत्यु भएको भारतका जल यातायात मन्त्री सर्वानन्द सोनोवालले पुष्टि गरेका छन्। उक्त घटनाले भारतीय चालक दलको सुरक्षाबारे गम्भीर चिन्ता थपिएको छ।
मन्त्री सोनोवालका अनुसार पलाउको झण्डा बोकेको एमटी सेटेबेलो नामक जहाजमा भएको आक्रमणपछि बेपत्ता भनिएका तीन भारतीय नाविकलाई पछि मृत अवस्थामा फेला पारिएको हो। उनले विज्ञप्तिमा उक्त घटनालाई अत्यन्त दुर्भाग्यपूर्ण र पीडादायी बताउँदै मृत्युको औपचारिक पुष्टि गरिएको जानकारी दिए।
भारतको विदेश मन्त्रालयले बुधबार उक्त जहाजमाथिको अमेरिकी आक्रमणपछि नयाँदिल्लीस्थित एक वरिष्ठ अमेरिकी कूटनीतिज्ञलाई बोलाएर कडा विरोध जनाएको छ। घटनाले कूटनीतिक स्तरमा पनि तनाव उत्पन्न गरेको छ।
यो हप्ता मुख्य रुपमा भारतीय चालक दल रहेका व्यापारिक जहाजमा भएको यो दोस्रो अमेरिकी आक्रमण भएको बताइएको छ। यसअघि जुन ८ मा ओमान अधिकारीहरूले पलाउ झण्डावाहक ट्याङ्कर एमटी मारिभेक्सबाट २४ जना भारतीय नाविकलाई सुरक्षित रुपमा एयरलिफ्ट गरेका थिए।
घटनासम्बन्धी तस्बिरमा जहाजको पुल र आवास कक्षबाट बाक्लो कालो धुवाँ निस्किरहेको तथा चालक दलका सदस्यहरूलाई हेलिकप्टरमार्फत उद्धार गरिएको देखिएको थियो।
मन्त्री सोनोवालले सरकारले शोकाकुल परिवारसँग पूर्ण एकता प्रकट गरेको उल्लेख गर्दै कठिन घडीमा भारत सरकार पीडित परिवारसँग दृढ रुपमा उभिएको बताए।
उनका अनुसार उद्धार गरिएका चालक दलका सदस्यहरूलाई छिटो भारत फर्काउने तयारी भइरहेको छ। मृतकका पार्थिव शरीरलाई पनि अन्तिम संस्कारका लागि यथाशीघ्र स्वदेश ल्याउन सम्बन्धित निकायलाई निर्देशन दिइएको छ।
घटनाले समुद्री मार्गमा व्यापारिक जहाज र चालक दलको सुरक्षा, विशेषगरी अन्तर्राष्ट्रिय सैन्य तनावबीच, अझ चुनौतीपूर्ण बन्दै गएको संकेत गरेको छ।
