सीप परीक्षण प्रमाणीकरण कार्यक्रम स्थगित

रोजगार

गृहपृष्ठ
रोजगार

सीप परीक्षण प्रमाणीकरण कार्यक्रम स्थगित

क्यापिटल नेपाल बुधबार, असार ३, २०८३

काठमाडौं। साउदी अरबले नेपाल सरकारसँग समन्वय नगरी एकतर्फी रुपमा लागू गर्न खोजिएको अनिवार्य सीप परीक्षण प्रमाणीकरण कार्यक्रम म्यानपावर व्यवसायीको चर्को विरोधपछि स्थगित भएको छ।

आजदेखि सुरु हुने भनिएको सीप परीक्षण काठमाडौंस्थित बसुन्धारामा रहेको कार्यक्रम स्थलमा पुगेर मेनपावर व्यवसायीहरुले यसको विरोध गर्दै बोर्ड र गेट हटाएपछि अन्ततः यो स्थगित भएको हो।

वैदेशिक रोजगार व्यवसायीहरूले एकाधिकार खडा गरी सीप परीक्षणको नाममा प्रमाणपत्र बेच्न श्रमिकमाथि रकम असुल गर्न खोजेको भन्दै तालिम प्रदायक संस्थामा घेराउ गर्न गएपछि ट्रेनिङ इन्स्टिच्युटले स्थागितको सूचना टाँसेको हो।

व्यवसायीको तीव्र दबाबपछि इन्डस्ट्रियल ट्रेनिङ इन्स्टिच्युट नेपालले हाललाई उक्त कार्यक्रम स्थगित गरेको घोषणा गरेको छ। तर, यसबारे अहिलेसम्म साउदी दूतावासले कुनै औपचारिक सूचना जारी गरेको छैन। त्यस्तै नयाँ नियमअनुसार साउदी जान चाहने श्रमिकले १५ हजार रुपैयाँ शुल्क तिरेर सिप परीक्षण पास गर्नुपर्ने व्यवस्था थियो।

साउदी अरबले आजदेखि लागू हुने गरी सुरु गरिएको सीप परीक्षाबारे नेपाल सरकार यो विषयमा आफूहरु जानकार नरहेको बुझिएको छ। युवा, श्रम तथा रोजगार मन्त्रालयका प्रवक्ता पिताम्बर घिमिरेले गन्त्वय मुलुक साउदी अरबले अनिवार्य सीप प्रमाणीकरण गर्न लागेको विषयमा औपचारिक जानकारी नआएको क्यापिटल नेपाललाई उनले बताए।

साउदी अरब वा राजदूतावासले यस विषयमा कुनै जानकारी नगराएको उनले बताए। घिमिरेले सञ्चार माध्यममा आएपछि आफूले जानकारी पाएको बताए। सीप परीक्षणको विषयलाई लिएर वैदेशिक रोजगार व्यवसायी संघले ज्ञापनपत्र बुझाएका भन्दै यस विषयमा थप बुझने उनको भनाइ छ।

प्रकाशित मिति: बुधबार, असार ३, २०८३ १८:३५

प्रतिक्रिया दिनुहोस्