डोल्माले फुडमाण्डुलाई दियो ४६ करोड, आफ्नै क्लाउड किचेन सुरु गर्ने योजना

मुख्य समाचार

गृहपृष्ठ
मुख्य समाचार

डोल्माले फुडमाण्डुलाई दियो ४६ करोड, आफ्नै क्लाउड किचेन सुरु गर्ने योजना

क्यापिटल नेपाल शुक्रबार, पुस ३०, २०७८

काठमाडौं । देशकै ठूलो फूड डेलिभरी गर्ने ई–कमर्श कम्पनी फुडमाण्डुलाई डोल्मा इम्प्याक्ट फण्डले ४६ करोड रुपैयाँ स्वपूँजी (इक्टिी) दिने भएको छ । दुबै कम्पनी हालैमात्र लगानी सम्झौता हस्ताक्षर गर्दै सोको घोषणा गरेका हुन् ।

काठमाडौं उपत्यकाभित्र फूड तथा ग्रोसरी आईटमहरुको डेलिभरी गर्दै आइरहेको फुडमाण्डुले उक्त लगानी आएसँगै अब क्लाउड किचेनको भर्टिकल व्यवसाय सुरु गर्ने कम्पनीका संस्थापक मनोहर अधिकारीले बताएका छन् ।

फुडमाण्डुले काठमाडौं उपत्यका र पोखराका ८ सय भन्दा धेरै रेस्टुरेन्टहरुको खाना ग्राहकको अर्डर बमोजिम डेलिभर गर्दै आइरहेको छ । तर, लगानीमार्फत क्लाउड किचेन सुरु भएपछि फूडमाण्डुले आफ्नै किचेनबाट समेत खाना बनाएर ग्राहकसम्म पुर्याउनेछ । फुड डेलिभरी गर्ने ई–कमर्श कम्पनीको क्षेत्रमा क्लाउड किचेनलाई ‘सोलिड बिजनेस मोडल’ को रुपमा लिइन्छ ।

डोल्मा इम्प्याक्ट फण्डबाट आउने ४६ करोड रुपैयाँको अधिकाँश रकम क्लाउड किचेनमा लगानी गरी बाँकी फण्डलाई नयाँ भर्टिकल, भूगोलमा व्यवसाय विस्तार गर्न तथा प्रविधि र टिम क्षमता अभिवृद्धि गर्न प्रयोग गर्ने फूडमाण्डुले बताएको छ ।

११ वर्ष अघि स्थापना भएको फुडमाण्डुले डोल्मा इम्प्याक्ट फण्ड भन्दा अघि २०१६ मा ट्रु नर्थ अशोसिएटसबाट पहिलो राउण्डको लगानी प्राप्त गरेको थियो । यसैगरी दोस्रो राउण्ड अन्तर्गत २०२०मा टिम भेन्चर्सले फुडमाण्डुमा लगानी गरेको थियो ।

नेपालको प्रमुख स्टार्टअप लगानीकर्ता कम्पनीमध्येको एक डोल्मा इम्प्याक्ट फण्डले पछिल्लो समय ई–कमर्श कम्पनी सस्तो डिलमा पनि १ अर्ब रुपैयाँ लगानीको घोषणा गरेको थियो ।

प्रकाशित मिति: शुक्रबार, पुस ३०, २०७८ १३:४५

प्रतिक्रिया दिनुहोस्