अर्थमन्त्री महतले भने– मेरो र घरको पनि बिमा गरेको छैन

अर्थतन्त्र

गृहपृष्ठ
अर्थतन्त्र

अर्थमन्त्री महतले भने– मेरो र घरको पनि बिमा गरेको छैन

क्यापिटल नेपालसोमबार, भदौ १८, २०८०

काठमाडौं। अर्थमन्त्री डा. प्रकाशशरण महतले आफ्नो जीवन बिमा र घरको बिमा दुबै नभएको बताएका छन्।

सोमबार नेपाल बिमा प्राधिकरण र बैंकिङ समाचारले गरेको ‘नेसनल इन्स्योरेन्स डिस्कोर्स’ मा सम्बोधन गर्दै उनले यस्तो बताएका हुन्।

‘अहिलेसम्म केही भएको छैन र अब पनि केही हुन्न भन्ने सोचाइमा हामी बसेका छौं। त्यसैले गर्दा हामीले आफ्नो र आफ्ना उत्पादनको बिमा नगरी बस्ने गरेका छौं,’ अर्थमन्त्री महतले भने, ‘यही धारणा र मान्यताका कारण मेरो आफ्नै जीवन बिमा र घरको बिमा भएको छैन।’

उनले कोरोना बिमाको केही भुक्तान गरेको बताउँदै स्वास्थ्य मन्त्रालयबाट नै दाबीमा गलत प्रवृति देखिएको कारण रोकिएको पनि उल्लेख गरे। स्वास्थ्य मन्त्रालयबाट यसका सन्दर्भमा वास्तविक तथ्यांक आएको खन्डमा उक्त रकम भुक्तान हुने महतको भनाइ छ।

‘हामीले बिमालाई सूचना प्रविधिमैत्री बनाउँदै लगेको खन्डमा यसले समग्र बिमा क्षेत्र सुधारमा सहयोग गर्छ,’ अर्थमन्त्री महतले भने, ‘त्यसैले समयअनुकुल प्रविधि क्षेत्रतर्फ हामी अगाडि बढ्न आवश्यक छ।’

उनले बिमा ऐन पनि सरकारले छिट्टै अगाडि बढाउने जानकारी दिए।

प्रकाशित मिति: सोमबार, भदौ १८, २०८० १९:४१

प्रतिक्रिया दिनुहोस्