स्पेनिस लगानीकर्तालाई नेपालमा लगानी बढाउन महासंघ अध्यक्ष ढकालको आग्रह

उद्योग

गृहपृष्ठ
उद्योग

स्पेनिस लगानीकर्तालाई नेपालमा लगानी बढाउन महासंघ अध्यक्ष ढकालको आग्रह

क्यापिटल नेपाल शनिबार, साउन १२, २०८१

काठमाडौं। नेपाल उद्योग वाणिज्य महासंघ अध्यक्ष चन्द्रप्रसाद ढकालले स्पेनिस लगानीकर्तालाई नेपालमा लगानी बढाउन आग्रह गरेका छन्। नेपालमा लगानीका प्रशस्त अवसर रहेकाले त्यसको सदुपयोग गर्न ढकालले आग्रह गरे।

अध्यक्ष ढकालले महासंघ सचिवालयमा शुक्रबार बार्सिलोना चेम्बर अफ कमर्सका अध्यक्ष जोसेप सान्ताक्रेउ बोन्जोचसँगको भेटमा नेपालमा स्पेनको लगानी बढाउन आग्रह गरेका हुन्।

ढकालले नेपाल र स्पेनबीचको व्यापारको तथ्यांकलाई प्रस्तुत गर्दै बार्सिलोना चेम्बर अफ कमर्सका अध्यक्षलाई दुई चेम्बरले व्यापार र लगानीका लागि सहकार्य उपाय खोज्न आग्रह गरे। उनले दुई चेम्बरबीच राम्रो सम्बन्ध कायम भए नेपालले स्पेनमा निर्यात बढाउन सहयोग पुग्ने बताए।

ढकालले पछिल्लो दशकमा नेपालको कुल गार्हस्थ उत्पादन वृद्धिदर ४ प्रतिशतदेखि ६ प्रतिशतको हाराहारी रहेको जानकारी दिए। महासंघको पहलमा सरकारले आठ वटा लगानी ऐन परिमार्जन गरेको उनको भनाइ छ। ‘यी सुधार विदेशी लगानीका लागि थप अनुकूल वातावरण सिर्जना र नेपालमा व्यापार सहजता सुनिश्चित गर्न गरिएको हो,’ उनले भने ।

उनले भारत र चीनबीचको नेपालको रणनीतिक स्थानले विश्वका दुई ठूला बजारमा व्यापार र लगानीका लागि अवसर उपलब्ध गराएको उल्लेख गरे।

बार्सिलोना चेम्बर अफ कमर्स अध्यक्ष जोसेप सान्ताक्रेउ बोन्जोचले दुई चेम्बरबीच राम्रो सहकार्य हुन सक्ने औंल्याए। उनले नेपाल उद्योग वाणिज्य महासंघसँग साझेदारीका लागि पहल गर्ने प्रतिबद्धता जनाए।

महासंघका पूर्वअध्यक्ष चण्डीराज ढकालले साझेदारी कायम गर्न सके दुवै चेम्बरका लागि फाइदा हुने बताए।

प्रकाशित मिति: शनिबार, साउन १२, २०८१ १६:००

प्रतिक्रिया दिनुहोस्