थप कानुन संशोधन गर्दै लगानी वातावरण बनाउनुपर्छः महासंघ अध्यक्ष ढकाल

उद्योग

गृहपृष्ठ
उद्योग

थप कानुन संशोधन गर्दै लगानी वातावरण बनाउनुपर्छः महासंघ अध्यक्ष ढकाल

क्यापिटल नेपालबिहीबार, मंसिर १३, २०८१

काठमाडौं। नेपाल उद्योग वाणिज्य महासंघका अध्यक्ष चन्द्रप्रसाद ढकालले लगानीका लागि अझै केही कानुन संशोधन गर्न जरुरी रहेको बताएका छन्।

बिहीबार काठमाडौंमा आयोजित प्लाष्ट नेपाल २०२४ कार्यक्रमलाई सम्बोधन गर्दै उनले गत वैशाखको लगानी सम्मेलनको समयमा एकैपटक अध्यादेशमार्फत कानुन संशोधन भए पनि तिनको नियमावली र कार्यविधि तयार नभएकाले कार्यान्वयन हुन नसकेको गुनासो गरे।

उनले हाल निजी क्षेत्रका अन्तःशुल्क, उत्पादित सामग्री खेर जाने र मूल्यलगायतका समस्या रहेकाले यसको व्यावहारिक निर्णय गरेर समयमै सम्बोधन गर्नुपर्ने धारणा व्यक्त गरे।

अध्यक्ष ढकालले भने, ‘सरकार र निजी क्षेत्रको सक्रियतामा लागनी सम्मेलन सम्पन्न भयो। कानुन संशोधन भए तर, तिनको नियमावली र कार्यविधि तयार नभएको अवस्था छ। त्यो चीजलाई सम्बोधन आवश्यक छ। चाहे आन्तरिक होस् वा बाह्य लगानी भित्र्याउन। कतिपय कानुन अझै परिवर्तन गर्नुपर्नेछ।’

वर्तमान सरकाले निजी क्षेत्रलाई प्राथमिकता दिएर व्यवसायीलाई सँगै राखेर छलफल गरिरहेको भन्दै उनले निजी क्षेत्रले यसलाई स्वागतका रुपमा लिएको बताए। महासंघको सुझावअनुसार उच्चस्तरीय आर्थिक सुधार आयोग गठन प्रस्ताव गरेकमा आयोग गठन गरेर निजी क्षेत्रलाई समेट्न खोजिएकामा उनले धन्यवाद दिए।

उनले आयोगले दिने सुझावका लागि व्यवसायीलाई प्राथमिकताअनुसार लगानी प्रभावित गरेका कानुनबारे सुझाव दिन आह्वान गरे। समस्या समाधान गरे छोटो समयमा आर्थिक सुधार गर्न सकिने उनको भनाइ थियो।

प्रकाशित मिति: बिहीबार, मंसिर १३, २०८१ १५:०८

प्रतिक्रिया दिनुहोस्