निसान गाडीले कर्मचारी कटौती गर्दै, अवकाशमा जानेको आवेदन माग

अटो

गृहपृष्ठ
अटो

निसान गाडीले कर्मचारी कटौती गर्दै, अवकाशमा जानेको आवेदन माग

क्यापिटल नेपालआइतबार, जेठ ४, २०८२

काठमाडौं। निसान मोटर कम्पनीले जापानका प्रशासनिक कर्मचारीबाट जुलाईदेखि अवकाशका लागि आवेदन माग गर्ने योजना बनाएको छ।

कम्पनीले विश्वव्यापी रूपमा करिब २० हजार रोजगारी कटौती गर्ने योजनाअन्तर्गत अवकाश हुन चाहने कर्मचारीको नाम अफिसमा दर्ता गर्न भनेको स्थानीय सञ्चार माध्यमले आइतबार जनाएका छन्।

जापानी अटोमेकर (कार कम्पनी) निसानले पहिले बिक्री र लेखामा काम गर्ने लक्षित कर्मचारीलाई प्रारम्भिक सेवानिवृत्ति प्याकेजबारे सूचित गरिसकेको छ।

‘यसले बिक्री र लेखामा काम गर्नेहरूलाई लक्षित गर्नेछ भने विकास र उत्पादन शाखामा काम गर्ने कर्मचारीका लागि यो योजना आकर्षित हुने छैन,’ क्योदो न्यूजले यस मामिलामा नजिकको स्रोतलाई उद्धृत गर्दै जानकारी गराएको छ।

कम्पनीले ४५ देखि ६४ वर्ष उमेर समूहका श्रमिकलाई समेट्ने यो योजना जुलाई र अगष्टमा उपलब्ध गराइने जनाएको छ। तर, अवकाश स्वीकार गरिने आवेदनको संख्या भने खुलाएको छैन।

कमजोर बिक्रीसँग जुधिरहेको जापानको तेस्रो ठूलो अटोमेकरले मंगलबार आर्थिक वर्ष २०२४ मा ६७०.८ अर्ब येन (करिब ४.५४ अर्ब अमेरिकी डलर)को भारी खुद घाटा भएको रिपोर्ट गर्दै पुनर्संरचना उपायको घोषणा गरेको छ।

आर्थिक वर्ष २०२७ सम्ममा आफ्नो विश्वव्यापी श्रमशक्तिमा करिब १५ प्रतिशतले कटौती गर्नुका साथै योकोहामास्थित अटोमेकरले सोही अवधिमा विश्वव्यापी रूपमा आफ्ना सवारी प्लान्ट १७ बाट १० मा झार्ने योजना बनाएको छ।

प्रकाशित मिति: आइतबार, जेठ ४, २०८२ १६:५१

प्रतिक्रिया दिनुहोस्