काठमाडौं। अष्ट्रेलियामा गरिबीमा जीवनयापन गर्ने जनसंख्या सन् २०२४/२५ आर्थिक वर्षमा ३७ लाख पुगेको छ। यो देशको कुल जनसंख्याको १४.२ प्रतिशत हो।
अष्ट्रेलियन सामाजिक सेवा परिषद् (एसीओएसएस) र न्यु साउथ वेल्स विश्वविद्यालयले तयार पारेको ‘अष्ट्रेलियामा गरिबी सन् २०२५ः सारांश’ प्रतिवेदनअनुसार, अघिल्लो तथ्यांक सन् २०२१/२३ मा गरिबी दर १२।४ प्रतिशत थियो। जुन अब उल्लेखनीय रूपमा बढेर १४.२ प्रतिशत पुगेको छ।
न्यू साउथ वेल्स विश्वविद्यालयकी वरिष्ठ अनुसन्धानकर्ता युविस्थी नायडूका अनुसार पछिल्ला दुई वर्षमा घरभाडामा अत्यधिक वृद्धि भएकोले खास गरी न्यून आम्दानी भएका व्यक्तिको जीवनमा गम्भीर असर परेको छ।
प्रतिवेदनअनुसार सन् २०२१ अगस्तदेखि २०२३ अगस्तसम्मको अवधिमा ब्रिस्बेनमा घरभाडा ४१ प्रतिशत, सिड्नीमा ४० प्रतिशत र मेलबोर्नमा ३४ प्रतिशतले बढेको छ।
बालबालिकाको अवस्थासमेत चिन्ताजनक रहेको प्रतिवेदनमा उल्लेख छ। सन् २०२३/२४ मा अष्ट्रेलियामा प्रत्येक ६ बालबालिकामध्ये एक जना गरिबीको चपेटामा छन्, जसको संख्या ७ लाख ५७ हजार पुग्छ।
एसीओएसएसकी प्रमुख कार्यकारी अधिकृत क्यासान्ड्रा गोल्डीले सरकारको हालसम्मका प्रयास स्वागत योग्य भए पनि अपर्याप्त रहेको बताउँदै थप ठोस कदम चाल्न आवश्यक रहेको धारणा राखे।
उनले भने, ‘सरकारले अत्यन्तै न्यून रहेका आम्दानी सहायता भत्ता बढाउनुपर्ने, गरिबी न्यूनीकरणका लागि स्पष्ट लक्ष्य तोक्नुपर्ने, सामाजिक आवासको व्यवस्था विस्तार गर्नुपर्ने र सबैलाई रोजगारी सुनिश्चित गर्ने नीति ल्याउनुपर्छ। साथै, गरिबी घटाउने कार्यमा सबैलाई जिम्मेवार बनाउने गरी समयबद्ध लक्ष्य निर्धारण गरिनुपर्छ।’
