अमेरिका–चीन व्यापार सम्झौताको मस्यौदा तयार, ट्रम्प–सी वार्तापछि अन्तिम हस्ताक्षर हुँदै

अन्तर्राष्ट्रिय

गृहपृष्ठ
अन्तर्राष्ट्रिय

अमेरिका–चीन व्यापार सम्झौताको मस्यौदा तयार, ट्रम्प–सी वार्तापछि अन्तिम हस्ताक्षर हुँदै

क्यापिटल नेपाल सोमबार, कात्तिक १०, २०८२

काठमाडौं। एसिया भ्रमणमा रहेका अमेरिकी राष्ट्रपति डोनाल्ड ट्रम्प र चिनियाँ समकक्षी सी जिनपिङबीच दुई देशबीच चुलिएको व्यापार विवाद, वैश्विक द्वन्द्वलगायत विषयमा वार्ता हुने भएको छ।

मलेसिया भ्रमणका क्रममा राष्ट्रपति ट्रम्पले थाइल्यान्ड र कम्बोडियाबीचको जारी सीमा विवाद समाधान गर्न सम्झौतामा हस्ताक्षर गर्न सफल भएका छन्। अमेरिका र चीनबीच सम्भावित व्यापार सम्झौताको ढाँचामा पनि सहमति भएको अन्तर्राष्ट्रिय सञ्चार माध्यमले जनाएका छन्।

यसबारे राष्ट्रपति ट्रम्प र सीबीचको बैठकमा व्यापार विवादमा चुलिएका विषयलाई समाधान गर्ने गरी छलफल हुने अमेरिकी अर्थमन्त्री स्कट बेसेन्टले जानकारी दिएका छन्।

बेसेन्टले व्यापार सम्झौतामा टिकटकको अमेरिकी सञ्चालनमा अन्तिम सम्झौता र दुर्लभ खनिजमा चीनले लगाएको नयाँ नियन्त्रण स्थगित गर्ने निर्णय समावेश रहेको बताए।

यसले विश्वका दुई ठूला अर्थतन्त्रबीच चलिरहेको व्यापार युद्धलाई थप चर्किनबाट रोक्न प्रयास गर्ने बताइएको छ। अमेरिकी राष्ट्रपति ट्रम्पले हालै चिनियाँ सामानमा प्रस्ताव गरेको शतप्रतिशत कर लागू नहुने सम्भावना रहेको उनको भनाइ छ। उनका अनुसार चीनले अमेरिकाबाट ठूलो मात्रामा भटमास खरिद पुनः सुरु गर्नेछ।

राष्ट्रपति ट्रम्प एसियाको साताव्यापी लामो भ्रमणमा छन्। यस क्रममा उनले दक्षिण कोरियामा चिनियाँ समकक्षीलाई भेट्नेछन्।–एजेन्सी

प्रकाशित मिति: सोमबार, कात्तिक १०, २०८२ ११:०८

प्रतिक्रिया दिनुहोस्