काठमाडौं। नेपालमा पछिल्लो समय लामो दूरीका यात्रा तथा अफ–रोड राइडिङप्रति युवा पुस्ताको झुकाव तीव्र रूपमा बढ्दै गएको छ। सामाजिक सञ्जाल र युट्युबमा देखिने हेभी बाइकका रोमान्चक भिडियोले युवालाई टुरिङ संस्कृतितर्फ थप आकर्षित बनाइरहेको बेला महँंगा नयाँ मोडल किन्न नसक्ने धेरै राइडर सेकेन्ड–ह्याण्ड विकल्पतर्फ मोडिएका छन्।
यसै कारण रिकन्डिसन हाउसमा उच्च क्षमताका पावरफुल मोटरसाइकल खोज्ने ग्राहकको चाप ह्वात्तै बढेको व्यवसायीहरूको भनाइ छ।
सेकेन्ड ह्यान्ड बजारमा रोयल इन्फिल्डका मोडल मात्र बिक्री गर्दै आएका पोखरा ट्रेडर्सका सञ्चालक सन्तोष मैनाली अहिले अफरोडमा बाइक राइडिङ जाने ट्रेन्ड बढ्दै गएकाले सेकेन्ड ह्याण्ड बजारमा यिनको माग बढेको बताउँछन्।
‘अहिले युवाहरूले युट्युब, टिकटक वा इन्स्टाग्राममा हेर्ने ट्राभल भ्लगमा प्रायः ठूला र हेभी बाइक प्रयोग भएको देखिन्छ,’ मैनालीले भने, ‘जसका कारण उनीहरूलाई पनि त्यस्तै बाइक किन्ने र यात्रामा निस्कने प्रेरणा मिल्छ।,’ नयाँ पावरफुल बाइक तुलनात्मक रुपमा महँगो पर्ने भएकाले पनि धेरैको रोजाइमा पावरफुल इन्जिनका सेकेन्ड ह्यान्ड बाइक पर्न थालेको उनको भनाइ छ।
उनका अनुसार नयाँ पावरफुल इन्जिनका बाइक तुलनात्मक रूपमा महँगो पर्ने भएकाले मध्यम आय भएका वा भर्खरै राइडिङ सुरु गर्न चाहने युवाहरूका लागि रिकन्डिसन हाउस एक उत्तम विकल्प बनेका छन्। कम लगानीमा पावर र कन्डिसन दुवै पाउन सकिने भएकाले रिकन्डिसन हाउसमा पावरफुल बाइकको आकर्षण तीव्र रूपमा बढेको मैनाली बताउँछन्।
‘रोयल इन्फिल्डको अहिले एउटा मोडलमा ३०–४० हजार रुपैयाँ मूल्य बढेकाले सेकेन्ड ह्यान्ड बजारमा खोज्न आउने ग्राहकको संख्या धेरै छ,’ मैनाली भन्छन्, ‘कम मूल्यमा नै फ्रेस बाइक पाउने र पुरानो मोडलको बाइक धेरैले मन पराएकाले अहिले यसको सेकेन्ड ह्यान्ड बजारमा माग बढ्दो छ।’ हाल प्रिमियम बाइक युवा वर्गको पहिलो रोजाइ बन्न थालेकाले सेकेन्ड ह्यान्डमा पनि यसको बजार राम्रो भएको उनको भनाइ छ।
विगतमा रिकन्डिसन हाउसमा सानो इन्जिन क्षमताका कम मूल्यका स्कुटर तथा मोटरसाइकलको मात्रै बिक्री हुने गर्थे। ३०–४० हजारको बजेट लिएर रिकन्डिसन हाउस चहार्ने ग्राहकहरूको बाहुल्यता हुन्थ्यो। तर, पछिल्लो समय यो बजारको प्रवृत्तिमा उल्लेखनीय फेरबदल आएको छ। मध्यमदेखि उच्च इन्जिन क्षमता भएका अर्थात् २५० देखि ५०० सिसीका ‘पावरफुल’ मोटरसाइकलमा ग्राहक आकर्षण तीव्र रूपमा बढेको छ।
पछिल्लो समय नेपालमा बाइक राइडिङ र ट्राभलिङ संस्कृति तीव्र गतिमा विकास भएको छ। सामाजिक सञ्जाल र युट्युबमा हेभी बाइकमा लामो दूरीको यात्रा गरेका भिडिओले युवालाई ठूला बाइक चढ्न प्रेरित गरेका छन्। लामो र कठिन यात्राका लागि ठूला इन्जिन क्षमताका बलिया बाइकहरू आवश्यक पर्छन्, नयाँ पावरफुल बाइक तुलनात्मक रुपमा महंगो पर्छन तर, सेकेन्ड ह्याण्डमा सस्तोमा उपलब्ध हुने भएकाले रिकन्डिसन हाउसहरुमा पावरफुल इन्जिन भएका बाइकमा युवाको क्रेज बढ्दो छ।
बानियाँज रिकन्डिसन हाउसका संचालक सुमन बानियाँकाअनुसार, केही वर्षअघिसम्म १५० सीसीभन्दा कम क्षमताका मोटरसाइकलहरू रिकन्डिसन हाउसहरूमा कमै आउँथे र आए पनि तत्काल बिक्री हुन्थे। तर अहिले बजारमा ठूला र शक्तिशाली बाइकहरूको माग ह्वात्तै बढेको छ।
बानियाँज रिकन्डिसन हाउसका संचालक सुमन बानियाँकाअनुसार केही वर्ष अघिसम्म कम क्षमताका सस्ता बाइक खोज्ने ग्राहक आउँथे। तर, अहिले बजारमा पावरफुल बाइक खोज्ने ग्राहकको संख्या बढ्दै गएको छ। ‘अहिले रिकन्डिसन हाउसमा रोयल इनफिल्ड, बेनेली, केटीएमलगायत ब्रान्डका उच्च सिसीका मोडल खोज्ने ग्राहक बढ्दै गएका छन्,’ उनले भने, ‘पहिले ग्राहकले माइलेज र कम मूल्य खोज्थे तर अहिले ट्रेन्ड पूरै फेरिएको छ। युवा पुस्ता विशेषगरी ३०० देखि ४०० सिसीका बाइकमा आकर्षित हुन्छन्।’ अहिले ग्राहकको रोजाइमा सेकेन्ड ह्याण्डमा पनि पावरफुल र महँगा बाइक मोडल पर्ने गरेको उनको भनाइ छ।
उनका अनुसार राम्रो कन्डिसनका ठूला बाइकहरू रिकन्डिसन हाउसमा आएको थोरै समयमा नै बिक्री हुने गर्छन्। नेपालमा नयाँ पावरफुल बाइकको मूल्य ५ लाखदेखि सुरु हुने गरेको छ, जसले गर्दा मध्यम आय भएका वा भर्खरै बाइक चढ्न सुरु गरेका युवाहरूलाई महँगा ब्रान्डका बाइक किन्न कठिन हुन्छ। रिकन्डिसन बजारमा भने तुलनात्मक रूपमा धेरै कम मूल्यमा राम्रो कन्डिसनको शक्तिशाली बाइक पाउन सकिन्छ।
विगतका दिनमा एउटा मोटरसाइकल किनेपछि थोत्रो नहुदाँसम्म चलाउने र पछि रिकन्डिसनमा बिक्री गर्ने चलन थियो। अहिले मन परेको मोटरसाइकल बजारमा आउँदा पुरानो दिइहाल्ने चलन बढेकोले बेच्न पनि सजिलो भएको छ। अहिले त दुईपांग्रे सवारीसाधनको प्रयोग आवश्यकताभन्दा पनि स्टाइलिस बाइक चलाउँ भन्ने हिसाबले यसको बजार बढ्दै गएको छ।
दुईपांग्रे सवारीसाधन सहज र छिटो छरितो यात्राका लागि हरेक मानिसको रोजाइमा पर्ने गरेको छ। सवारीसाधन प्रयोग गर्ने इच्छा भएका तर, आम्दानी कम भएका व्यक्तिहरुका लागि सेकेन्ड ह्यान्ड बाइक उचित मानिन्छ। कम आम्दानीमा खरिद गर्न सकिने र आफूलाई मन परेको मोडलको बाइक खरिद गर्नेले पनि सेकेन्ड ह्यान्ड मोटरसाइक तथा स्कुटर किन्दै आएक छन्।
रिकन्डिसन हाउसमा दुई पांग्रे ईभी पाउनै मुश्किल
नेपालमा ईभी बाइक तथा स्कुटर आउन सुरु भएको लामो समय भएपनि यसको सेकेन्ड ह्याण्ड बजारमा भने खासै आएको छैन। दुई पांग्रे सेकेन्ड ह्याण्ड सवारीसाधन रिकन्डिसन हाउसमा उपलब्ध हुँदा दुईपांग्रे ईभी भने बजारमा पाउन नै मुस्किल छ।
सेकेन्ड ह्यान्ड बजारमा ईभी बाइक तथा स्कुटर खोज्ने ग्राहक कम आउने भएकाले रकन्डिसन हाउसमा नराखेको रिजाल रिकन्डिसन हाउसका सविन रिजाल बताउँछन्।
‘ईभी बाइक तथा स्कुटर भ्यालुयसन कम हुन्छ। ईभी रिकन्डिसन हाउसमा महँगोमा ल्याउँछन्, जसका कारण राख्ने गरेका छैनाैं,’ उनले भने, ‘साधारणतया ईभीमा भएको ब्याट्रीमा २ देखि ३ वर्षको वारेन्टी दिएको हुन्छ। रिकन्डिसन हाउसमा आउँदासम्म त्यो स्कुटरको ब्याट्रीमा समस्या आइसकेको हुन्छ,’ ईभी सेकेन्ड ह्यान्डको व्यापारमा रिस्क हुने भएकाले रिकन्डिसन हाउसमा नराखेको उनको भनाइ छ।
पछिल्लो समय बाइक तथा स्कुटर अत्यावश्यक सवारीसाधन जस्तै भएको छ। नेपाली बजारमा दिनप्रतिदिन ईभी आयात तथा प्रयोग पनि बढ्दै गएको छ। नयाँ ईभी बाइक तथा स्कुटर आयात र प्रयोग बढे पनि रिकन्डिसन व्यवसायीले रिस्क हुने भन्दै बिक्रीमा नराखेको उनकाे भनाइ छ।
नयाँ ईभी बाइक तथा स्कुटर नै ग्राहक रोजाइमा पर्न नसकेकाले सेकेन्ड ह्याण्ड बजारमा ईभी बाइक तथा स्कुटर नआएको सेकेन्ड ह्याण्ड बाइक तथा स्कुटर बिक्री गर्ने गरिमा रिकन्डिसन हाउसका सञ्चालक डिके भट्ट बताउँछन्। ‘नयाँ ईभी बाइक तथा स्कुटरको बजार छैन। आयात नै कम भएपछि रिकन्डिसन हाउसमा पनि कम आउँछन्। कतै भेटिए पनि हामीले राख्ने गरेको छैन,’ भट्टले भने, ‘कुनै पनि रिकन्डिसन हाउसमा ईभी पाउन नै मुस्किल छ। नयाँमा नै बिक्री हुन्न, सेकेन्ड ह्याण्ड कस्ले किन्छ? ईभी सेकेन्ड ह्यान्डको व्यापारमा रिस्क हुने भएकाले राख्ने गरिएकाे छैन।’
