अध्यागमन नीतिमा कडाइ गर्दै अमेरिका, वर्क परमिट वैधता ५ वर्षबाट १८ महिनामै झारियो

अन्तर्राष्ट्रिय

गृहपृष्ठ
अन्तर्राष्ट्रिय

अध्यागमन नीतिमा कडाइ गर्दै अमेरिका, वर्क परमिट वैधता ५ वर्षबाट १८ महिनामै झारियो

क्यापिटल नेपाल शनिबार, मंसिर २०, २०८२

काठमाडौं। अमेरिकाको यूएस सिटिजनसिप एन्ड इमिग्रेसन सर्भिसेज (यूएससीआईएस)ले ग्रिनकार्ड आवेदक र अन्य संरक्षित आप्रवासीलाई जारी गरिने वर्क परमिटको वैधता पाँच वर्षबाट घटाएर १८ महिनामा झारेको छ। यो परिवर्तनले विदेशी नागरिकको बारम्बार जाँच गर्ने अमेरिकी राष्ट्रपति डोनाल्ड ट्रम्प प्रशासनको निर्णयलाई सघाउने बताइएको छ।

यो निर्णयले शरणार्थी, आश्रय खोज्नेहरू र ‘स्टेटस समायोजन’ पर्खिरहेका आवेदकलाई पनि असर गर्नेछ। ट्रम्प प्रशासनको यो निर्णयले लाखौं मानिसलाई असर गर्नुका साथै वर्क परमिटको साथ आश्रय खोज्नेमा निर्भर रहने र मिट प्याकिङ उद्योगजस्ता कम्पनीमा पनि प्रभाव पार्ने अमेरिकी अखबार वाल स्ट्रिट जर्नलले जनाएको छ।

ह्वाइट हाउसनजिकै एक अफगानी नागरिकद्वारा दुई नेसनल गार्ड सदस्यलाई गोली हानिएको घटनाको एक सातापछि यो कदम चालिएको हो। ट्रम्प प्रशासनले यस वर्षको अन्त्यसम्म ६ लाखलाई देश निकाला गर्ने लक्ष्य राखेको छ।

हालसम्म करिब २० लाख मानिसले अमेरिका छाडिसकेका छन्, जसमा ५.३ लाख निर्वासन र १६ लाख स्वैच्छाले फर्कनेहरू समावेश छन्।

धेरै डेमोक्रयाट शासित सहरमा संघीय अध्यागमन तथा भन्सार प्रवर्तन (आईसीई) एजेन्टले आपराधिक आप्रवासीलाई निशाना बनाइरहेको अन्तर्राष्ट्रिय सञ्चार माध्यमले जनाएका छन्। राजधानी वासिङ्टनमा पक्राउ गरिएका ८० प्रतिशत मानिसको पहिले कुनै आपराधिक रेकर्ड नभएको बताइएको छ।

राष्ट्रपति ट्रम्पले अगस्त ११ मा वासिङ्टनमा सार्वजनिक सुरक्षा आपतकाल घोषणा गरेका थिए । त्यसयता आईसीईले करिब ११ सय मानिसलाई हिरासतमा लिएको छ।–एजेन्सी

प्रकाशित मिति: शनिबार, मंसिर २०, २०८२ ११:२०

प्रतिक्रिया दिनुहोस्