मुस्ताङ। एक सातामा नेपाल-चीन उत्तरी कोरलानाका हुँदै चिनियाँ कम्पनीका ६१४ वटा विद्युतीय सवारी साधन (ईभी) नेपाल भित्रिएका छन्। कोरला नाकास्थित लोमन्थाङ गाउँपालिका १ न्हेचुङस्थित मुस्ताङ भन्सार कार्यालयका अनुसार ७ जेठदेखि १५ गतेसम्म कोरलानाका हुँदै नेपालतर्फ ६१४ वटा ईभी नेपाल भित्रिएका हुन्।
भन्सार कार्यालयका प्रमुख विदुर चुँडालका अनुसार कोरलानाका हुँदै चीनबाट पैठारी गरिएका विद्युतीय सवारी साधनमध्ये ६१४ वटा ईभीको भन्सार जाँचपास भइसकेको छ। नेपाल भित्रिएर भन्सार जाँचपास भइसकेका विद्युतीय सवारी साधन बिवाइडी कम्पनीको रहेका उनले जानकारी दिए।
चिनियाँ कम्पनीमार्फत बनेका त्यस्ता विद्युतीय सवारी साधन कति सङ्ख्यामा नेपाल भित्रँदै छन् भन्ने यकीन जानकारी प्राप्त नभएको भन्सार प्रमुख चुँडालले बताए।
“हिउँदयामपछि पहिलो चरणमा नाकाबाट इभी भित्रिन थालेका छन्, अझै ठूलो सङ्ख्यामा यहाँबाट ईभी नेपाल भित्रिने जानकारी पाएका छौँ,” उनले भने, “बिवाइडीले कति वटा ईभी नेपाल भित्र्याउँदैछ भन्ने जानकारी छैन, नेपाल भित्रिएका कतिपय विद्युतीय सवारी भन्सार जाँचपासको चरणमा छन्।”
कोरलानाकाबाट भित्रिएका ईभीको भन्सार जाँचपास भई गन्तव्यतर्फ प्रस्थान गरेका लोमान्थाङ हुँदै जोमसोम झर्ने क्रममा रहेका भन्सार प्रमुख चुँडालले जानकारी दिए। एकसतामा भन्सार जाँचपास भएका करिब २०० भन्दाबढी विद्युुतीय सवारीसाधन मुस्ताङको जोमसोम आइपुगेका छन्।
नाकाबाट भित्रिएका सवारी साधनमध्ये घरपझोङ ४ जोमसोमस्थित सार्वजिक बसपार्कमा पार्किङ गरी चार्जिङका लागि रोकिएका उनले बताए। नेपाल–चीन कोरलानाकाबाट भित्रिएका ईभीका लागि चार्जिक स्टेसन कम हुँदा ‘होल्डिङ’ गरी बस्नुपर्ने अवस्था रहेको भन्सार प्रमुख चुँडालको भनाइ छ।
नेपाल–चीन उत्तरी कोरलानाका गत भदौ ३१ गतेदेखि पूर्ण रुपमा सञ्चालनमा ल्याइएको हो। तातोपानी नाका र रसुवागढी नाकाको विकल्पमा प्रयोग गरिएको यसनाका पूर्ण रूपमा सञ्चालनमा आएसँगै चीनतर्फ निकासी तथा पैठारी कारोबार वृद्धि भएको भन्सार प्रमुख चुँडालले जानकारी दिए। उनका अनुसार कोरलानाकाबाट गत पुस मसान्तसम्म दुई हजार ३२९ वटा इभी नेपाल भित्रिएका छन्।
मुस्ताङ भन्सार कार्यालयका प्रमुख चुँडालका अनुसार गत भदौ ३१ गतेदेखि वैशाखसम्म यो नाका हुँदै निकासी तथा पैठारीबाट भन्सार राजस्व पाँच अर्ब ७८ करोड छ लाख संकलन भएको छ।
कोरलानाकाबाट विद्युतीय सवारी साधनसहित अन्य सामानको चीनतर्फ निकासी तथा पैठारी हुँदा स्थानीय युवाले वैकल्पिक रोजगारी प्राप्त गरेका उनको भनाइ छ। चीनबाट भित्रिने इभी तथा मालबाहक कन्टेनर सीमावर्ती स्थानीय चालकले चलाउने गर्दा स्थानीय युवाले रोजगारी पाएका उनले उल्लेख गरे।
