समाज

राहदानी विभागमा छापाः सिष्टम कब्जा गर्ने ‘बिचौलिया’ सुनिल र बुद्धि पक्राउ

क्यापिटल नेपाल बिहीबार, कात्तिक १३, २०८२

काठमाडौं। राहदानी विभागको सिष्टम र कर्मचारीलाई आफ्नो नियन्त्रणमा लिएर अवैध धन्दा चलाइरहेका सुनिल नेपाली र बुद्धि नारायण श्रेष्ठलाई कालिकाटी प्रहरीले पक्राउ गरेको छ।

सेवाग्राहीसँग मोटो रकम असुल्दै तुरुन्तै पासपोर्ट बनाएर उपलब्ध गराउँदै आएका सुनिलबारे क्यापिटल नेपालले बुधबार समाचार प्रकाशित गरेको थियो। बुधबार बिहानैदेखि उनीमाथि निगरानी बढाएको प्रहरीले अपरान्ह नियन्त्रणमा लिएको हो।

राहदानी विभागको सिष्टम आफ्नो कब्जा लिने र मोटो रकम बुझाउनेलाई सोही दिन पासपोर्ट दिने गरेको समाचार क्यापिटलले प्रकाशित गरेको थियो। उनीहरूले 'हाकिमलाई रकम बुझाउनुपर्छ' तपाईको पासपोर्ट आजै बन्छ भन्दै सेवाग्राहीबाट ठूलो रकम असुल्दै आएका थिए।

उनले सेवाग्राहीबाट ठूलो रकम असुल्ने गरेको विभागका उच्च पदस्थ कर्मचारी पूर्ण जानकार थिए। कर्मचारीकै ग्रिन सिग्नलमा उनले राहदानी विभाग आफ्नो नियन्त्रणमा लिएका हुन्।

सेवाग्राहीलाई एकै दिनमा पासपोर्ट दिने र उनीहरुबाट २७ हजार रुपैयाँ लिने गर्थे। उनलाई नसमाइ राहदानी बनाउन असम्भव प्रायः थियो। उनको शरणमा पुग्ने बित्तिकै पासपोर्टको फारमका लागि मिति पाइन्थ्यो। पासपोर्ट विभागले एक घण्टाका लागि फारम भर्ने भने पनि उनका लागि जुनबेला पनि सिष्टम खुला हुँदै आएको थियो।